خواطر وأشعار

ازْرَعْ بذور

 

بقلمي

رمضان محمد محمود

ازرع بذور

كلمة طيبة مع الناس

بس خلي بالك لازم تكون

بحال الناس حساس

وحياتك لو لسانك حلو

ليحملوك ع الراس

وخلي بالك كله بيتكتب

ف الدفاتر والكراس

عامل الناس بأصول

وأدب وإحساس

دا اللي مش حلو مع الناس

بييجي يوم وينداس

ويبقى عند الناس

ما يسواش مداس

 

ازرع بذور ثقة

وخلي عندك أمان

وصون العرض للناس

بدل ما تيجي في يوم

ومشاكلك تكتر بالكوم

وما ينفعوك حراس

وتعيش وسط الناس

ويشاوروا عليك ويقولوا

يا اللي ملكش اساس

 

ازرع بذور جبر خاطر

دا مفيش اغلى منها

وحياتك ما هتكلفك

دا كمان هتكبرك

وان شاء الله بسببها

هتحل مشاكلك كلها

واي مشكلة شارك

وبلاش تهرب وتقول

دا انا مش كدها

ربك كبير وقادر

يساعدك في حلها

بس انت انوي

بس انوي وقول

يا رب حلَّها وفُكَّها

ازرع بذور امل

في أرض يائس

كل الناس تركتوا

بمشكلتو حايس

يمكن ترسم الضحكة

وما تخليه عابس

وتلبَّسو توب الأمل

وبعد ما كان ضعيف

تخليه فارس

ازرع بذور الكرم

تنفع في يوم الحساب

تخلي صفحتك بيضا

أما ربك يديك الكتاب

دا انت لو كريم

ربك هيكون أكرم

ولو قابلت لئيم

ما تكتر معاه عتاب

الكريم مش محتاج ياخد

اجر على كرمه

لا من عدو ولا

حتى من أحباب

شيل بسرعه

بذور الحسد من حياتك

وحب الخير لأحبابك

ولو كرمك زايد كمان

حبو كمان لاعدائك

عشان ينشغلوا عنك

ويسبوك ف حالك

ازرع بذور خير

لكل احبابك

 

بقلمي

رمضان محمد محمود

مقالات ذات صلة

اترك تعليقاً

زر الذهاب إلى الأعلى