خواطر وأشعار
آهاتي يا مسحراتي .. بقلم رمضان محمد محمود
آهاتي يا مسحراتي
بقلم
رمضان محمد محمود
يا عم يا مسحراتي
ما تعرفش تغني
وتعبَّر عن آلامي
وتطبَّل على آهاتي
دا أنا ياما عندي آهات
من يوم وانا صُغَيَّر
لو حكتهالك
وحياتك منَّها لتتحيَّر
هموم مليانة وجع
ما يحملها غير الجدع
لو قلتلك عليها
قلبك يصيبو فزع
ولكن مقدرش احكيها
ولو نويت أرويها
ما بلاقي حد يداويها
من جوع ولا شبع
واللي يسمعها يقول
ما انا عندي منها كتير
ومين ومين سِمع
هموم فقر وحرمان
دا مش من المال
ولا حتى من إهمال
ولا ذلِّة سؤال
دا كان كله مرار
مَرار مِن فقدان
أم حنونة ماتت
بدري قبل أوان
قبل الزمان بزمان
أدعي يا مسحراتي معايا
يسامحها الرحمن
يمكن بطيبة قلبك
يكتب لها الغفران
يا رب يا قادر
تغفر وتسامح
لأم عبدك رمضان
آهاتي يا مسحراتي .. بقلم رمضان محمد محمود
