قصدت بابك
قصدت بابك
——-كلمات الشاعر احمد جابر سويلم
وعهدت نفسى لغير بابك ماقربلوش
وعهد بينى وبينك وغيرى مايعرفهوش
واللى معاه ربنا للعباد مايحوجهوش
ايه فايدة المال مدام المال ماينفعهوش
وايه فايدة الصاحب عالشر مايحشهوش
كلام هقوله وكنت انت ماتعرفهوش
اكتب معايا الكلام متقولشى مافهمتوش
اول نصيحه حروفها على الورق منقوش
فيه صاحب تعرفو وصاحب متعرفهوش
صاحب يصحبك ووقت الجد متلقهوش
وصاحب يخاف الاذى عنك تملى يحوش
تانى نصيحه مالك فى الحرام ماتصرفهوش
وواعى الفقير تغضبه والصدقه عنه تحوش
قصدت بابك وغير بابك ماقصدتوش
امك وابوك صونهم واعرف جمايلهم
ماتقولشى اوف دى كلمه ممكن تزعلهم
طبطب على امك وابوك وقوم بوس ايدهم
اياك تفرق بين زوجتك وبين جمايلهم
الطاعه واجب واولادك للطاعه علمهم
علم ولادك امور الدنيا وكمان امور دينهم
علم ولادك ازاى يغيرو ويحبوا اوطانهم
حافظ على جيرانك واحسن تعاملهم
الشر لو جاهم ابعدو هتنول الرضا منهم
وكلمة الحق سيف ديما تكون بينك وبينهم
قصدت بابك وغير بابك ماقصدتوش
ورضيت بعدلك سيف للظلم به احوش
الدنيا غابه فيها بشر وفيها وحوش
وفيها اللى لدينه مايعرفهوش
وفيها الندل ويا الجبان توب واحد ماتعرفهوش
وفيها اللى صوته من الادب ماتسمعهوش
بكره القيامه تقوم لنا ولاانت عن نفسنا هنحوش
افهم كلامى متقلشى ماقراتهوش
صبح شهاده عليك متقولشى ماسمعتوش
