خواطر وأشعار

كان عندي حلم .. بقلم عاطف كبارة

كان عندي حلم

 بقلم عاطف كبارة

كان عندي حلم
خطوطه لسة بتترسم
كان عندي قلب
ملامحه دايما تبتسم
وف بيتنا لقمة بتتقسم
كان عندي إخوات

كان عندي حلم

وحشتني أمي وحضنها
ضحكة أبويا وعزها
ولعبتي وحبة حاجات
كان عندي حلم وبيت
وشجرة زرعتها
عند البيبان
وبنبض قلبي سقيت
لحد ما شوفتها
بتطرح ورود
وف كل ليل غنيت
بكلمة كتبتها
فوق الحيطان
لكن في مرة صحيت
سمعت بلحنها
صوت البارود
كله إختفى من بعدها
وكله مات…..
باعيش ف خيمة
وأرض صحرا
وبرد موت
وسمايا غيمة
وجاية مطرة
ف ليل سكوت
صوروا دمعة عيوني
وإكتبوا….
وإتألموا لدقيقة وإبكوا
بدمعتين ..
وإزاى هدومنا مقطعة
وإتصعبوا…
آخرتها إيه سطرين عزاء
من كلمتين ..
وسيبونا ينحت جسمنا
برد السنين…
والجوع يقطع بطننا
ومتشردين…
بقينا فين وكنا فين
لو تعرفوا
أنا بنت مين…؟؟
أنا بنت ليبيا والسودان
بنت العراق ونهرها ومجدها….
خير اليمن وجبال لبنان
شجر الزتون بفلسطين
وبحرها…
وحشتني سوريا وأرضها
وحشتني أمي وحضنها
ضحكة أبويا وعزها
لعبتي وحبة حاجات
كان عندي حلم
بيترسم…
كان عندي قلب
بيبتسم…
وأم وأب وإخوات
كله إختفى
كله مات…….

مقالات ذات صلة

اترك تعليقاً

شاهد أيضاً
إغلاق
زر الذهاب إلى الأعلى