القصة والأدب

حكايتي مع لعنه جدي

جريدة الاضواء

حكايتي مع لعنه جدي

 

كتب محمد : حجاب

 

كان عندي اربعه اصدقاء .

واحد صاحب مصنع ..

والثاني مستورد قطع غيار ..

والثالث صاحب شركه مقاولات

والرابع مستخلص جمارك ..

اصدقاء غالين وعشرة سنين كنا بنتقابل علي القهوة كل يوم

وعلشان انا صحفي غلبان كانوا بيحاسبولي علي طلبات القهوة

وتقريبا من سنه مش عارف اتلم عليهم ..

اخر مرة سألت عليهم فوجئت بشيئ غريب جدا ..

القهوجي قالي

ان صاحب المصنع قفل مصنعه وهربان من أصحاب الديون .

والمستورد حالته المادية صعبه جدا ومش عارف يحصل فلوسه من السوق علشان مش عارف يورد بضاعه للتجار لدرجه انه مش لاقي ياكل هو وعياله ..

اما صاحب شركه المقاولات اتضح انه محبوس في قضيه مخالفه مباني ومطلوب منه مبلغ كبير واهل الحته الله يكرمهم بيجمعوله قرشين ..

اما صاحبي المستخلص محجوز في مستشفي المجانين بعد ما قتل عياله ومشي ملط في الشارع ..

سمعت الكلام من القهوجي ومشيت مذهول !!!!

ايه اللي حصل وكان مستخبيلهم فين كل دا ..

افتكرت جدتي زمان قالتلي انت يا محمد عندك لعنه بتصيب اللي حواليك بوقف الحال والفشل ودي نتيجه سحر قديم ..

وكان معمول لحد من اجدادك من حوالي سبع تلاف سنه .

وكان من الملوك الكبار وفي يوم خرج للحرب ومعاة جيش جبار وانتصر علي الأعداء وهزمهم وقهرهم وكانت خسايرهم كبيرة جدا .

أم إيه ملك الأعداء المهزوم جمع السحرة وعملوا لجدك سحر اصابه بلعنه الفشل .

لا يتوفق في عمل ولا اللي حواليه يتوفقوا .

وعلشان كان مبيسمعش لرأي حد يعني ( دماغه ناشفه) ومرضاش يجيب سحرة تفكله اللعنه ..

ومن يومها كل ١٠٠ سنه اللعنه بتصيب واحد من احفادة ومع الأسف كان الاختيار عليك انت يا محمد ..

النهايه علشان مطولش عليكم قررت اقعد في البيت وأختفي عن الناس علشان اللعنه متأذيش حد تاني وكتبت الكلام دا انهاردا لاني حسيت اني مخنوق وحبيت افضفض معاكم

يمكن حد يلاقي حل او يمكن دعواتكم تفك اللعنه

محمد حجاب في ٢٠٢٢/٩/٢١

مقالات ذات صلة

اترك تعليقاً

شاهد أيضاً
إغلاق
زر الذهاب إلى الأعلى