مزاد……..
” مزاد ”
الشاعر/خالد فضل
كل حاجه فى المزاد
حتى فيروز الجميله
فى المزاد
حتى عم الشيخ إمام
حتى صاحبى حسن إمام
حتى مولانا الإمام
حتى أنا …….. !
لاقيتنى محطوط فى المزاد
حتى أعلام البلاد
حتى أحلام الولاد
كل حاجه فى المزاد
من الصحاب حتى الكِتاب
حتى أفلام الفتوه
وحتى افلام الملاوعه والعذاب
كل شىء جوه المزاد
إلا .. كتاب
مكتوب عليه ( 50 جنيه )
سألت ليه ؟
وإيه الأسباب ؟
قالولى دا أحسن كتاب
كله حِكم …. !
كله مواعظ من زمان
وفيه صلاه وفيه زكاه
وفيه خشوع وصوم وجوع .. وفيه إيمان
وفيه كليم وفيه مسيح
وفيه عظيم
خير الأنام
فيه كل أنواع الكلام
وكل أطياب الطعام
من المحاشى للبرام
أنا قولت دا أعظم كتاب
لازم أجيبو ولو بكام
فتشت نفسى
بنفس نفسى
لاقيتنى أفلس خلق الله
وأنا أصلى محطوط فى المزاد
مفيش معايا أى زاد
ولا أى مال
أراجوز وملمومه عليه كل العيال
إزاى بقه … !
وفيه حقيقه مؤكده
ينفع المتباع يبيع أو يشترى
وقانون مزادنا
غبى وجشع ومفترى
أنا قولت أهرب م المزاد
وهربت فعلا
وخدت ويايا الإمام
وسيبت فوق
محسن ونور وحسن إمام
وفضلت اجرى للأمام
لحد ماركبت الترام
المترو يعنى
أى حاجه والسلام
ورجعت للبيت بالسلامه
وقولت مشوار الندامه
كتنى خيبه وكتنى نيله
كان قصادى 100 علامه
بتقولى خليك جوه بيتك
جوه غيطك
عيش بغيظك
عيش حياتك و السلام
بلا ثقافه بلا كلام ف كتاب
بلا حبل دايب
بلا أمل كداب
إحنا يدوبك .. بضاعه
مرصوصه جوه مزاد
يدوب نوافق على بيعنا لروحنا
ونداوى بإيدينا جروحنا
وبردوا بنصقف
ولسه بنصقف
لأصحاب الكتاب
الشاعر خالد فضل
من وحى منتدى ” جاليرى حيفا “
