أخلاق للبيع
— أخلاق للبيع
أخلاق للبيع … أخلاق للبيع ……
مين اللي عايز أخلاق
أخلاق ايه يا عم
هي الأخلاق بتتباع؟؟
يا عم دا الاخلاق
أرزاق موزعها الخلَّاق
وع العموم افرش ورِّينا
يمكن تعجبنا وتدِّينا
وزي ما قالوا اللي
ما يشتري يتفرج
انت هتشتري؟
واللا ناوي تهرَّج ؟؟
معاك أخلاق ايه
وتمنها قد ايه
أخلاقي سعرها رخيص
ما عمري ابيعها
الا لكل واحد خسيس
انت م البداية هتشتمنا
انا مش بشتم ولا حاجة
انا عايزك تكون حسيس
اول نوع معايا تأثيره سريع
أي نعم ممكن تقضي بيه المصالح
ولكن هتكون بين الناس وضيع
معايا نفاق وكدب وغش
يخليك تعمل الغلط
ويا دوب علاجه معلهش
لو عايز منه بشرط
يا دوب هتعامل الناس
بالف وش ووش
شوف عايز كام ..قرر بسرعة
دا انا لو ناديت حس
ََكتير بيعشق الغش
رغم ان محدش هياخدو
الا اللي ما يساوي قرش
رغم ان ممعهش تمنه
بس ممكن يبيع وطنه
بأقل من قرش
يا عم رووح دا انا فاكر
انك معاك ذمة وأمانة
كنت شريت منك
دا اخلاقك فيها ندامة
دا انت طلعت متفهمش
أخلاق الأمانة متتبعش
تلاقيها ف الإنسان الأصيل
اللي بيعرف يتعامل مع الناس
بشرف وذمة وأمانة
ف نهار او ف ليل
ويرد للناس الجِميل
وده رزق ربك
الوهاب الفتاح الجليل
بقلمي
رمضان محمد محمود
