إلى مصدر فخري …… أبي رحمه الله
—– إلى مصدر فخري
…… أبي رحمه الله
أبويا بيقولولوا يا عمده
من زمن فات
رغم انو راجل فقير
مش عمده بالتعيين
ضمير صاحي كل ساعات
على أقل حاجة يبات
بس كان في شبابه
تقولشي ابن بشوات
علَّمني أمانة وشرف
ونكران النفس والذات
عاش في زمن كله
الناس لبعضها سندات
يتقاسموا لقمتهم
حتى ولو قتات
كان كل ثقافتهم
يحافظوا ع الأمانات
والشرف كان عنوان
في الرايحات والجيات
كان مرة كنت مع صحبي
في الغيطان دايرين
بنلعب بأبسط حاجة
ومين اللي زيكم مين
وقلنا نشوي دره
هوا فيه غيرها يا عين
رحنا غيط صاحبي
جبنا كل واحد اتنين
شوينا الدرة وأكلنا
وكنا بيها مبسوطين
في اخر النهار روحنا
واحنا فرحانين
أبويا عِرف وقاللي:-
يا خاين ..يا قليل الدين
لاش تسرق من جارنا
من زرعه يا ابن ستين ؟
يا والدي دا كان ابنه معايا
دا احنا مخدناش الفدادين
قاللي ملكش حق تاخد
من غير ميعرف الوالدين
وحرمني من العشا
وسحلني وضربني كفين
وربطني في الوتد
جمب عجل ومعزتين
وقال لامي اوعى
ولا لقمة ولا لقمتين
قاللي عشان تتربى ..
والاوضة كانت ضلمة
قبل الكهربا بسنتين
ولو ما خالي سيد
الله يرحمو امييين
حررني من قيودي
وقاللي خليك امين
ومن ساعتها ممكن
مقصر ف بعض امور الدين
ولكن في الأمانة
شاربها من أبويا زين
وشبعت على طبليتو
وعيني ما راحت
شمال ولا يمين
يا رب يرحمك ياللي
علمتني من عرق الجبين
بقلمي
رمضان محمد محمود
