خواطر وأشعار
اكمنه .. قلبي
* اكمنه .. قلبي *
••••••••••••••••••••••••
فصللي قلب كده صفيح
مافهوش لا نبض ولا إحساس
ولا يتأثر يوم من تجريح
قلب يكون مايتوجعش
و ماتبنش فيه علامات
دايما جامد ومش هاش
كل ضيوفه يادوب زوار
ما يتركوش أي انطباع
يعدي كتيير وسط النار
و مايفرقش عنده مين باع
قلب بصحيح مايتمزقش
و مايطلبش عمليه جراحيه
وقت معاناته ما بينش
و لو مر بسكته قلبيه
إيه ذنبه بس يتألم
مهما يقاسي مايتكلم
أو يحكي بصوت عالي
ولا عشااان اكمنه قلبي
فالنصيب يبقي جروح
و المقاسي الاقيها في دربي
و منها تعاني ياما الروح
فهمت طلبي ليه يا زماني
و ليه طلبت قلبي صفيح
من اللي شفته و اللي جاني
و اللي قابلته و مكنش مريح
يمكن كتير سكوتي وجع
ماأحبش أوجع أبداً غيري
وانا منك ياما شفت البدع
لما فر و طاااااار طيري
أظن رسالتي كده وصلت
و عرفت حقيقة المضمون
و حروفي الموجعه اهي كتبت
بكل شكل و كل لون
بقلم
عمااادالأبنودي
15 / 8 /2021