” واحد محلل وصلحو “

” واحد محلل وصلحو ”

بقلم /الشاعر خالد فضل

واحد مُحلل وصلحو
يكتب كتابو ونروحوا
الميديا حِلفت تفضحو
إنسان حقير ملوش ضمير
وملوش كبير
لو نام ينجس مطرحو
يامطلقين يانادمنين
حللتو دينكم .. إفرحوا
الشرع حلل طلقتين
والتالته تيجى فُراق وبيين
ولسه عايزين تطمعوا
فاكرينها إيه
فراخ بانيه
فيچتار وسووا وتطفحوا
لو تعرفوا شرع الإله
كنتو تبكوا .. تنوحوا
ربك بيستر
عبدو مره .. مرتين
والتالته لازم يفضحو
الطلاق معمول عشان
غلط حصل بنصلحو
ماهوش عشان
لِعب وجِنان
ونروح لومان
دى المسأله قِلة إيمان
وناس لدين ربنا
لا يعرفوا ولا يفهموا

الجواز معمول عشان
بيت وأسره وحُسن عِشره
مش سب دين
وطلاق وفُرقه
وعيال تضيع وتبقى غارقه
وتضيع معاها أسره كامله
الأب جاهل والأم جاهله
يحصل طلاق
ووراه طلاق
وعيال كتير
تلاقيها تايهه
ومره سارقه
ومره تحت الكوبرى نايمه
م الأب هايف
والأم هايفه
عملوا الطلاق نكته وبايخه
وعيال مابينهم لسه دايخه
مابين محاكم وعِيشه زرقه

يااهل بلدى
ياكل بلدى
يااهل الشهامه ياكرام
الإيمان مش بالكلام
الإيمان عمل كمان
حافظوا على بيتكم بكلمه
كلمه حلوه
دى الكلمه صدقه
واياكوا كلمه
هيه كلمه .. سوده ضِلمه
وحتى كل حروفها ظالمه
الطلاق …!
يعنى البُعاد .. يعنى الفراق
يعنى الحياه والموت سواء
يعنى أسوء إبتلاء
الطلاق دا أصلو داء
والتقوى ليه أحسن دواء
بالمحبه وحبه حبه
يجى بعده الإتفاق
مش بالمكابره والمعانده والعناد
هنبنى بيت ونجيب عيال
تنفع الناس والبلاد

الطلاق بيجيب خراب
وعذاب وراه مليون عذاب
ياعم ياغاوى الطلاق
ياست ياسبب الطلاق
إرحمونا
وارحموا كل الولاد
اللى ضايع واللى صايع
واللى مرمى ف الشوارع
جمب غطيان بلاعات
ارحمونا
وارحموا كل الولاد
بكفيانا من الهموم
بكفيانا من الآهات

الحلول مش ف المحلل
اللى بنقولوا ياجردل
وفى الشوارع اسمه دلدل
الحلول
ف الرضا وياه قبول
مهما قالت أو يقول

هوه يستحمل شويه
وهيه تستحمل شويه
ونعدى اى محنه جايه
مشاكلنا تبقى مداريه
وصوتنا واطى كأنه عشق وملاغيه
لا حد يتدخل مابينا
اللى بينا هيبقى بينا
احترامنا هيبقى فرض
وسُنه حسنه منطقيه
ياجماعه
البيت دا لازم يبقى واحه
جنه واسعه واستراحه
وله بابين
باب بيقفل على عيوبنا
وباب بيفتح ع الصراحه

الشاعر خالد فضل