فرفوره ………
” فرفوره ………
الشاعر /خالد فضل
أنا فرفوره شطوره
أنا رايحه سنه أولى
وبدعى ربنا وأقولو
اكون دكتوره مشهوره
ومامتى بحبها خالص
وبابا بحبو .. عسوله
وبودى أخويا .. قلبى ياناس
بحبو أوى .. كده وخلاص
بحب حضانتى وكتابى
وكراستى وألوانى
وفصلى ف الدور التانى
بحب زمايلى ف الدكه
وبمشى معاهم السِكه
نغنى أغانى متيوره
بألحانها الصغيوره
وطيرى معانا
طيرى كمان
وطيرى ل فوق ياعصفوره
نبص نشوف شجر مكشوف
نموت م الخوف
ونجرى نستخبى بعيد
وشابكين الإيدين بالإيد
ونهمس ياامه جاى عفريت
ومطره ترخ فوق روسنا
وندعى يارب تانى تزيد
يقرب بيتنا اعمل باى
وتوته زميلتى تعمل باى
وصلت البيت .. وصلت إزاى
وبوسه بإيد صغنتوته
وأنا فرحانه مبسوطه
أشوف بابا وأشوف بودى
وماما هتحكى حدوته
وعينى تنام مع الأحلام
وشايفه نفسى كتكوته
وباكل نص بسكوته
ولسه بغنى أغنية
انا فرفوره شطوره
أنا رايحه سنه أولى
وبدعى ربنا وأقولو
أكون دكتوره مشهوره
الشاعر خالد فضل
إهداء إلى حفيدتى الجميله الأميره / فريده
