قالو مات
بقلم ـ سكينة الشريف
قالوا مات
ومن سكات
المخلة صرخت م الفزع
واتبعترت كل الحاجات
خرجت من الصرخة آهات
صور
صورة أمه
كمان أبوه
ودبلة فضة عليها اسمين
وسطهم
قلب اترسم
كانت هدية حلم عمره
….
طب سبوه
يحمي الوطن من كل شر
لمعتدي
او ترجع ضحكته بالسلامة
لعين أبوه
يشوفوه عريس ببدلته
وإيديه محنيه بزهور
و عروسته بتعد الدقايق
للفرح
فستانها الابيض في انتظار
فارس همام
عمره ماكان في يوم جبان
ولا يقبل انه يطاطي راسه
للمهانة
أهي واقفة تدعي بالدموع
وتقول يارب الموت يموت
ولا اشوف حبيبي جاي لنا
جثة في تابوت
والمخلة لساتها بتبكي كل
حاجة في قلبها
لوحة التعريف ماهو كان
عريف والجسارة كانت في
دمه
ماهو مات شريف
وهو مرفوع الجبين
ما دفنش راسه و استخبى
زي النعامة
والخوذة تاج
والقايش ماسك علي وسط
البطل
وسلاحه في ايده ومستعد
للدفاع
لكن العميل علشان خسيس
دفعه عمره التمن
وفي الاخير
العروسة لبست سواد
والقلب داب
وصوت العويل علا
والنور انطفى
لموا الليلة والمعازيم
صبحوا يعزوا في الجدع
وزفته بقت تابوت بيلف في
شوارع البلد ولبسه الابيض
اصبح كفن
علوا الزغاريد
ده العريس اصبح شهيد
دمه اتسكب جوه الوريد
وفي يوم هيغلي وينفجر
يزرع قنابل من بارود
تزرع اسود جنب الحدود
