الشاعر/ سعد الشرقاوي
انا يا خواتي كرهت التوتة
وكاره لمّة زيد وعبيد
دا احنا غلبنا من الحدّوتة
وكل يومين بنقول ونعيد
أصل التوتة على الزراعيّة
ولمّت كل الناس حواليّا
الليّ بيسقي ما طالش المايّه
والليّ يقول مش لاقي مبيد
,,,
يعني امبارح كنت مكوّع
وأنا مكمّم وشيّ بحاله
قاعد باسمع عمّنا عبده
لمّا البرد وصل لعياله
قام حوّلهم ع الدكتور
علشان يلحق يحجز دور
عمّال يبكي وكان مقهور
بعد الكشف ايه اللي جراله
,,,
قال دكتور العزبه لقيته
بيكلم معمل تحاليل
ويقول له ح ابعتلك عيلة
وتبعتلي الناولون بالليل
واتوصىّ بحقـّاتنا شويّه
وتتعوّض في المرّه الجايّه
ومريضنا لو ميّه الميّه
تكتب له الامراض بالشيل
,,,
دا الشركة بيتـّصلوا عليّا
ويقولوا دواهم ما اتباعشي
مندوبهم خاصم عيادتنا
وبقاله شهرين ما دفعشي
وباوعدكم ساعة ما يجونا
نلاغيكم وانتو تحاسبونا
وتقولوا تشابه فى كرونا
واتجمّد قلبك ما تخافشي
,,,,
الازمة فى الدنيا بحالها
والسعر بيرفع طوّالي
والفرصة أهي وصلت عيادتنا
وهاكوّش واريّش حالي
وتوصيّ العيان بالليل
يصرفها من عند خليل
وساعتها يدّيله بديل
عايز اعمل قرشين لعيالي
,,,,
اتاريها حصلت لابو عيطة
وبقالنا ع الحال دا سنين
ودكاتره عاملين تحويطة
بتحبسنا فى البيت شهرين
وبندفع كل المطلوب
وبنشرب في علاج مضروب
ونبلبع ميت صنف حبوب
ونحلـّل لليّ مخالطين
,,,
ولقيتني وانا تحت التوتة
مش قادر اسمع اخبار
وابص لأرضي المحروتة
واتقلـّب على جمر النار
م الآخر روّحت البيت
مش طايق اقعد في الغيط
بيتاجروا بينا الهلافيت
ونموتوا بأغلى الاسعار
