إبن الهرم والنيل
بقلمى محمد عنانى
أنا إبن الهرم والنيل
وإبن الآلام والويل
تتغنى فى المواويل
إبن الأمل والأمانى
وحلم طارح أغانى
ونهار بضيه الحانى
مصرى بطبعى أصيل
رغم إن ليلى طويل
وحظى يمكن قليل
شقيان وعايش بأعانى
وهمومى هدت كيانى
ودنيا كيدها ضنانى
شغلانى ومكعبلانى
فى أمورها ومحيرانى
وملجمه لى لسانى
لكنى عمرى ما أميل
عن حلم عمرى الجميل
ولا عندى غيرها بديل
دي مصر بلدى ومكانى
فى الماضى دُره وزمانى
وعِشق جارف ملانى
بأحكيه بكل المعانى
ما هيا حضنى وحنانى
وشطى فيها وأمانى
إبن مصر وكفانى
