سؤال
ليه بنستكبر نطلع الكلمه الحلوه من جوانا و نقولها لبعض ؟
ليه مستخسرين في بعض الإحساس الحلو إللي هنحسه لما نحرر المشاعر الحلوه المكبوته بداخلنا و نصرح بيها ؟
الكبر ده مضيع علينا جزء كبير من إنسانيتنا و يمكن نكون مكسلين نطلع الكلمه الحلوه دي و بنقول المهم الفعل و يمكن خايفين من رد فعل اللي قدامنا هيفهمنا و يقدرنا و لا هيستهين باللي هنقوله ، و يمكن و يمكن ،،،
طب و الحل إيه ؟
هنفضل ساكتين لحد ما الموت يسبقنا ؟ و ساعتها هيصبح كل الكلام اللي جوانا عقيم و وجوده زي عدمه إحنا بجد بنخسر كتير قوي لما بنسكت ، السكوت مش دايماً من ذهب يا جماعه ، الندم و الحسره مش هيرحمونا لو الموت سبقنا إلحقوا عبروا عن اللي جواكم للي بتحبوهم ، حرروا اللي انتوا فعلاً حاسينه ، طلعوا الكلام الحلو اللي قرب يموت من الحبسه و الكبت و صلاحيته هتنتهي ..
لو بتحب حد قول له ساكت ليه ؟
لو زعلان من أخوك إلحق صالحه و قول له إنت سندي ، لو مخاصم أبوك أو أمك إلحق راضيهم و قول لهم من غيركم ماليش لازمه ، لو مزعل مراتك روح صالحها و قول لها ربنا يخليكي ليا ، خدوا عيالكم في حضنكم ، اسبقوا الموت و طلعوا الحلو اللي قرب يحمض جواكم ، جربوا كده هتلاقوا طعم حلو أوي للحياه ما كنتوش عارفينه ، الحياه مالهاش ذنب في كل الهم و الضيق اللي بنعيشه صدقوني الخلل فينا إحنا. بقلم دعاء نور
