عن الفن والاحساس الجميل للمسلسلات زمان

بقلم/ أيمن بحر

الناس اللي مبهورة بمسلسل :
جعفر العمدة
لو كانوا حضروا أيام مسلسل :
ذئاب الجبل
اول ما اتعرض كان ممكن يحصلهم خلل فى الاستيعاب !!!؟

المسلسل ده كان عامل حالة غريبة عند الشعب المصرى … ووقت الحلقة كانت الشوارع بتفضى لدرجة إن لو فيه دولة كانت عايزة تحتلنا ما كانتش هتلاقي وقت انسب م الوقت ده

يجي ايه محمد رمضان جنب حلاوة وطعامة الفنان ( احمد عبد العزيز )
فتى احلام نص بنات مصر ف التسعينات وما ادراك ما التسعينات !!!؟

ولا الفنان الكبير ( عبدالله غيث )
ف دور علوان البكري لما كان يخبطلك واحدة :
اطلع من خلجاتي عاد
كنت تحس نفسك كده منشكح من العظمة
البدرى … ووردة … ودبور … وعلوان …
ونعمة … والخالة لبيبة … وياسين … ومهجة … !!!
كل دي شخصيات عاشت جوانا وكنا
بنتفاعل معاها بقلوبنا وعقولنا

مسلسل نضيف مكنتش تتكسف تسمعه مع حد من أهلك ولا تبقي قاعد وقلقان تسمع لفظ أو تشوف حاجة مش ولا بد !!!

دا حتي اغنية المسلسل بصوت الفنان :
( علي الحجار )
كانت حاجة ولا ف الخيال …
قالوا علينا ديابة
واحنا يا ناس غلابة ..

يا مغنواتي غنى حكايتنا علي الربابة

كل حاجة كانت معمولة بحرفنة وتحس كده الدنيا بسيطة وسهلة بدون حزق ومط على الفاضى …