$ و جالك قلب $

‏بقلم/عماد الأبنودي
‏
و جالك … قلب تكدبني
و تشكك يوم في هوايا
ناويت بالغدر كدا تبيعني
و تختم تفاصيل الحكايه
بيني وبينك حاكم عادل
يحكم لقلبي ف قسوتك
و يشوف كمان اللي فاضل
لسالي حاجة من دنيتك
مش هأبكي يوم ع هجرك
أنا هأبكي على خاين بايع
واجه يلا ف البعاد قدرك
عشان حبك سكته ضايع
تهون روحي لو حنتلك
و حبت .. بشوق ترجعلك
يدوسها عجل قطر الايام
ولا مرة تااااني تسمعلك
كتير …! ندمت من جوايا
إني رهنت رهان خسران
و عشمت حالي مع نفسي
و عشت دور عاشق ولهان
اتاريني مغفل جوه دايرة
مقفولة بأيدين أسوء سجان
وملامح خبثه مش باينة
أستاذ .. بجدارة و فناااان
خلاص الأصل مالوش عازه
مع قلب تملي ب يلومك
و عتابه بقا مالوش عازه
مادام .. هيسيبك لهمومك