تعالي معايا للقاضي
الشاعر رضا ابو شنب
( تعالي معايا للقاضي)
تعالي معايا للقاضي
و نحكي له عن الماضي
ومين في الدنيا فرقنا
ومين خلاني مش راضي
هقوله علي اللي جمعنا
ومين باعنا ومين بادي
ومين بكلامه صدعنا
و طلعنا علي الفاضي
هقوله يا قاضي اسمعنا
وهات معني لاوجاعنا
ولو حكمك هيوجعنا
انا راضي انا راضي
انا حبيتها من قلبي
وجوه عنيها محرابي
ومهما بداري او اخبي
بتفلت مني اعصابي
ومين قال الهوي ذنبي
وان الذنب مش عادي
انا علي الحب متربي
وفاتح كل ابوابي
انا من نظرة حبيتها
ونالت كل اعجابي
ونظرة عيني خليتها
تدق بايدها علي بابي
وست الكل سميتها
وكانت كل احبابي
وجوه عنيا خبيتها
وقلبي يدق و ينادي
وبعد ده كله اخرتها
شربت لوحدي عنابي
وسابت قلبي ولقيتها
بتهرب ويا اصحابي
ورنت فيا ضحكتها
وضحكوا عليا حسادي
و تاهت مني سكتها
وزادت فيا امراضي
وزادت فيا قسوتها
وزاد البعد وعنادي
انا من قلبي حبيتها
ومش قادر اكون ماضي
ومش قادر اكون ماضي
