كلام ، متعاد
*********
كلام ،،فقري ما لوهش وجود
شعاره الجوده م الموجود
كان الموجود تملي يجود
و فينا الضحكة بتجلجل
عشان الطفل يسترجل
و لجل يعيش و يتحمل
بيجري قوام يجيب العيش
و طبق الفول عليه كام قرص طعمية
و عود جرجير و بصلاية علي قوطاية
و حبة مش م الزلعة اللي فوق السطح
دا ، كان يومه، في ساعة الصُبح
يلف اللفة ، نستكفي و قاعدتنا كانت بالدور
يدور بينا الكلام وندور علي السفرة في طبلية
و كل ما فينا يتلفت علي ، الغية
يا واد انت ماليت الزير ، فين القُلة طب اجري
قوام ،ناولني كوز من المية ،، و ما تنساش
تعلق نار علي البراد ، بسرعة يا واد
عشان الشاي ، و نحبس باللي فينا و جاي
و هات سكر يكون ، برا،،
، عشان عمك حدق مش جاي
رجعنا نكمل الحكايات مع الأوقات
بنتذكر ساعات و ساعات
كلام متعاد و فيه الدنيا لاهيانا ،
مع الأوقات بيتغير
و طبع الدنيا ينسانا
ما عادش الطفل بيطيعك ،
ولا الأيام مطاوعانا
و حتي اللمة بتبيعك ،
بقيت وحدك تقول، يانا
في دنيا بتنكسر فيها ،
و بتكمل حكاويها
ووقت زمان ، اللي عاش فينا
صبح نسيان ف دنيا ،وجعها يكفينا،!!
*******************
شعر /ياسر عبد الحميد
*******************
مرتبط
