وبعدين فيكي يا صين
—– وبعدين فيكي يا صين
وبعدين فيكي يا صين
صاروخك يا ترى
هوا دلوقتي فين
بيلف ويدور
هيقع على مين
مش ناويه تعقلي
كل شويه تعملي
فصل بايخ بايخ
دا انتي دولة تِهْبلي
يعني نسيبلك الكوكب
بس هرُّوح فين
مرة كورونا زرعتيها
وبسرعة كمان وزعتيها
وف اقرب وقت بعتيها
يعني نشكيكي لمين
والعلماء راحوا فين
وكل شويه المذيع
يخرعنا ويقول لنا
دا عدَّى ع بلدنا
في يا دوب دقيقتين
آه لو كنت راكب الصاروخ
اروح وألفّ معاه
مطرح ما يروح أروح
وأشاور لكل اصحابي
وأهزَّر مع كل اللي اشوفوا
ف أسوان او مطروح
لو كنتي بتلعبي معانا
هزارك زاد ويانا
دا حتى هزارك بايخ
زودتي الرُّعب جوَّانا
دا العملية مش ناقصة مرار
الموت كل شويه عايشينوا
انتي كده بتلعبي بالنار
معقول طلع عن السيطرة ؟
دا الموضوع فيه أسرار
كل معلومانتا عندنا
مفيش بيطلع عن السيطرة
يا دوووب الا القطار
وتفسيرنا احنا ع طول
دا العيب م العربية الجرار
ويطلع ع الشاشة مسؤول
ويقدم لنا تقرير و إقرار
ان العيال ولاد الذين
بيخلعوا م القضبان مسمار
بالعربي بتلعبي بعمرنا
وهتغيري الأقدار
موضوعك كله بيخمَّن
الكل واقف محتاااار
يعني انتي يا صين
شيفانا خلاص قوي
ف حياتنا مبسوطين
حتى كلمة مبسوطين
اخرها يا ختي طين
البلد دي عايزه تتربَّى
دا العيب والله ما فيكي
دا عيب علماء شايفين
وعلى امرك ساكتين
عاملين انهم واعيين
وهمَّا أصلا نايمين
وبعدين فيكي يا صين
وبعدين فيكي يا صين
بقلمي
رمضان محمد محمود
