الاضحية والفقير فين حق اليتم
الاضحية والفقير
فين حق اليتم
شروط الأضحية من ناحيه العمر والمواصفات
طبعا كلنا عارفين إن لازم تكون سليمة ، بمعنى يكون مفهاش اى عيب سواء ف اللحم او الشحم …
وميكنش فيها اى مرض زى العرج أو العمى ولا مكسوره القرن ولا هزيلة وهكذا ….
حيث قال النبى صلى الله عليه وسلم (إنَّ اللَّهَ طَيِّبٌ لا يَقْبَلُ إلَّا طَيِّبًا)
و ب كده عرفنا المواصفات ،، طب العمر ❕
يشترط أن تبلغ الاضحية السن الذى حدده الشرع
1- الإبل 🐪 أن تكمل ال٥ سنوات فيما فوق …
2- العجول والإبقار 🐄 أن تكمل سنتين فيما فوق
3-الماعز 🐐 يشترط أن تتجاوز السنة وتكون ف السنه التانية.
4-الضأن 🐑 تكون تمت ال6 اشهر ودخلت ف الشهر السابع .
كده خلصنا أول نقطة معانا النهارده
نيجى بقى لتانى نقطة 2️⃣
أجزاء الاضحية
نبدأ بالعجل أو الأبقار
1- الرأس : ودى طبعا معروفة بلحمة الراس ، بنطلع منها اللسان والمخ ودول سعرهم بيبقى غالى شوية بالنسبة للحمة الرأس ، وطبعا دى اكتر وجبة مشهوره ف فطار اول يوم عيد متحمر كده باالقسماط
2- الرقبة : معروفه بالدوش ، وغنية باللحم وسميكة
وتعتبر ارخص من باقى الاجزاء الاخرى .
3- الكتف : أو الزند ، بتبقى خشنة ودسمة ومتداخله مع عظم الكتف، عشان كده بتحتاج وقت طويل ف التسوية ، وبتحتوى ع نسبة من الدهون والكولاجين ⚪
4- الضلوع : الريش ودى غنية باللحم تمتد من الكتف للبطن ، وطبعا كلنا بنحب طعمها جدا طب ليه عشان فيها عصارة وسوايل كتير لقربها من العضم .
5- بيت الكلاوى : اكتر جزء بيتم استخدامه ف اجزاء الاضحيه وبيبقى سعره غالى جدا ؛ لانه بيبقى أقل كثافه ونسيجه ناعم..، ف بنطلع منه الفيليه والستيك والأنتركوت ومش بياخد وقت ف التسوية .
6-وش الفخذة : شبه لحم الكتف بالظبط ف السمك والخشانة
7- موزة الفخذة : قليلة الدسم ومتكدسة باللحم ، بناخد منها الاسكالوب وكباب الحلة والحاجات الحلوه دى
، وطبعا مش بتاخد وقت ف التسوية عشان كده سعرها اغلى من اللحمة العادية
8- الجنب : معروفة ب هبرة البطن ، ودى بتتقطع لقطع مستطيله ورقيقة ، وقليلة ف اللحم شويه
9- صدر الحيوان : اسفل الضلوع ومليان دهون عشان كده بيستخدم ف الفرم أو لعمل الطواجن الدسمة
10- موزة الدراع : قليلة ف الدسم واللحم وتستخدم للشوى أو الفرم بردو
11- الذيل : العكاوى ، ودى طبعا مليان عضم وقليلة ف اللحم ، بيتشال منها الجلد وتتقطع حلقات
12- الأرجل : الكوراع طبعا بيفضل الأرجل الخلفية في الكوارع لأنها افضل من ناحية الطعم والدسامة.
13- الامعاء : الممبار مش هنتكلم كتير هو بيتكلم عن نفسه وله اساليب كثير في التجهيز
14- الكبد :الكبدة ، وطبعا دى الوجبة المفضلة بعد الذبح مباشرة
15-الكلاوي والقلب والطحال : طبعا دول يتحمروا مع الكبدة وبالهنا والشفا بقى
16- الكرشة : معدة الذبيحة ودى طبعا اللى بنعمل بيها الكمونية وغير ذلك
17- الفشة : جمب الأمعاء ، وبتكون هشة و خفيفة ، تتسلق وتتقطع وتتحمر كده مع توابل جمب كبده وكلاوى وبالهنا والشفاء
و بكده خلصنا أول الاضحية لاتنس حق الايتام والفقراء والمساكين
وكل عام وانتم بخير