أنا جوزى مات
بقلم الشاعر راضى على الطهطاوى
وارتحت خلاص أنا من شكله
وزعيقه نهيقه ومشاكله
وافضيت للجيم وللنادى
والجو كتير بقى كدا هادى
وافضيت للنت وفيسبوكى
والواتس وايمو وللشات
..
أهو غار ومات موتة طبيعية.. راح بالساهل
ولافيش شبهات بتحوم بيَّه ….ما هو يستاهل
ايه خدنا منها الرجالة؟!
غير وصف الأرمل هجالة
باصرف فى معاشه على كيفى ….ومعايا الفيزا
على راحتى تمام ف مصاريفى… ودى أكبر ميزة
باع دهبى ولا سابلى الدبلة
ويجيبلى ميت حجة وسبلة
كان كيفه ..مزاجه و سجايره
واخدة الميزانية وفلوسات
..
جوزى مات
وزدت النُص أنا من بعدُه
كان حارق دمى ياناس قعدُه
لو شاف الضحكة فوق وشي
يقولِّى خليكى رزينة
لو دمعة نزلت على خدي …. يقولِّى نكدية حزينة
لو كلت كتير كدا مش عاجبه …. جسمك هيزيد
وان جوعت يقولِّى يا يبسانة … كعصاية حديد
رايح أو جاى
مِيت قهوة وشاى
وفحمة وشيشة وحطى الفيشة
وزميلتك دى اتصلت ليه ؟!!
وحماتك ليه عندك جات
.
كان للفجر يغيب ويعوق
يزعل لوقلنا هنتسوق
يشخط يتأمَّر..مشوى ومتحمَّر
ويقارن نانسى برشاقتى
وع التخن بتاعى بيتنمَّر
ويبرطم بوزه بغلاسته
يلقِّح كلمات
..
انا جوزى مات
وارتحت بجد
ياما حيلى معاه م الهم اتهد
ف دخول وطلوع كان بيكشَّر
ولا عمره لهدمة ف يوم نشَّر
وقاعدلى يا دوب ف البلكونة
بفنلة وبوكسر
بيبص ياخوي ع الستات
..
جوزى مات وفعلًا إيه يعنى
دا الكون م الفرحة ما بيساعنى
وبيقت انا عايقة…فايقة… رايقة
ولمركب بيتنا أنا سايقة
كان دايمًا مستنقد أكلى
ولا عاجبه هزارى ولا شكلى
ياما عشت معاه أنا ع المُرة
كان ناوى قال هيجيب ضُرَّة
كان فقرى ونقرى و كان جرَّة
وعاملى فيها المتفلسف
ع الهم بيصحى وبيبات
..
ياما شوفت أذاه ولا هنانى
اهو خدت عزاه طاب إيه تانى
مات مات وغار ستين داهية
م الفرحة لبسْت هدوم زاهية
وبقيت ف البيت آمرة وناهية
كان عامل واد سبع بورمبة
ولا شال بطيخة ولا كرنبة
يحكى بميت كدبة وميت فشرة
ان جبت الفلم يجيب نشرة
اهو غار وسابنى كدا براحتى
أسمع فى برامجى وحكايات
..
انا جوزى مات وعقبالك
تنولى يا اختى اللى ف بالك
عايش أو مات
مش فارقة حاجات
كان دايمًا يحلف ويأكِّد
دا حياتكم بعدى هتتنكد
بالعكس البيت أصبح راحة
بهدوء الواحة الفوَّاحة
ومسحنا دموعنا النواحة
وهدومة بسرعة
رميناها فى كيس جنب الترعة
الميِّت ميِّت على نفسه …راح
وبقيت فى براح
وكأنِّى محدش يوم سافر
ولا قطر الحزن ف يوم فات
ياما شافت عينك ألوفات
..
جوزى مات
وبقيت بنصيبى أنا راضية
م الليل للصبح ياناس فاضية
ألبس ع الموضة وأتذوَّق
وأزور فى معارض واتسوَّق
ويوماتى أنزل أتفسَّح
مع داليا و سوسن وزينات
جوزى مات
مع ألفين غارة وسلامات
مع ألفين غارة وسلامات
