خواطر وأشعار
شبعت حزن
شبعت حزن
كلمات…….. أيمن البكري
تعبت يا دنيا من كتر الجراح
شبعت حزن ونفسى أرتاح
أقرب الناس ليا
كلهم غدروا بيا
سابونى وأنا عنيا
مليانه بحر دموع
ذودى كمان
من الحزن والمرار
شايفانى جبان
مش قادر أخد قرار
فارقت كتير وكل إل راحوا
ملهمش رجوع
غلط كتير وأسأت الإختيار
مش هقدر أتحمل تانى إنتظار
وقف الزمان لف ولا دار
أنا ذى ما أنا بتألم وموجوع
أتارى العمر بيعدى
وأنا فاكر لسه بدرى
بنفذ فيه قدرى
وماشى على خط المكتوب
شفت عذاب
يكفينى بقيت عمرى
إنطفت شمسى وإختفى قمرى
علشان أقدر أكمل
محتاج صبر أيوب
الدنيا فيا بتكسر
خسرت ولسه هخسر
وناس شافتنى مدمر
إستغلوا ضعفى
وداسوا عليا أكتر
حمل الجبال شايل
واخدانى كعب داير
على الهموم والإوجاع
بتربى وبكبر
تعبت يا دنيا من كتر الجراح
شبعت حزن ونفسى أرتاح
