الزواج عند المصريين

الزواج عند المصريين القدماء ..

ايمان هيكل 

– لغاية دلوقتي لسه محتفظين بالعادات والتقاليد اللي ورثناها من اجدادنا القدماء في مختلف حياتنا من أول الطعام لغاية طقوس الاحتفالات بالأعياد ؛ فتعالوا نشوف ازاي المصريين القدماء كانوا بيتجوزوا وإن الزواج عندهم كان ليه قواعد وأعراف لغاية دلوقتي لسه موجودة .- اغرب حاجة كانت موجودة زمان أن الزواج كان بيحصل في سن مبكر ، يعني مثلاً الولد بيكون عنده ١٥ سنة ، والبنت عندها ١٢ سنه ويتم الزواج بينهم ، ومن النادر جدًا انك تلاقي ولد عنده ٢٠ سنة أو بنت عندها ١٤ سنة ولسه متجوزوش ..

طب كان فيه خطوبة زمان؟ 

٭طبعًا ؛ وكانت دبلة الخطوبة مصنوعة من الذهب وكانوا بيسموها (حلقة البعث) والعروسة كانت بتلبسها في ايديها اليمين ولما تتجوز تنقلها في الشمال زي ما بنعمل احنا دلوقتي ..

طب هما كانوا بيتجوزوا ازاي ؟

٭كان الزواج بيتم في المعبد وكان اللي بيكتبلهم العقد هو “الكاهن” وكان يشهد علي العقد ٥ شهود ، وكان عقد الزواج يُكتب علي مخطوطة وكانوا بيعملوا منها ٣ نسخ ؛ واحدة للعروسين ، وواحدة للكاهن ، والأخيرة كانت لدار المحفوظات عشان حقهم ميضيعش .

-وكانوا بيزينوا المكان اللي الحفلة هتتعمل فيه ، وكانت الزينة من زهور الياسمين التي تسمي في اللغة المصرية القديمة ( الياسمون) ..

طب اشمعنا كانت زهرة الياسمين بذات ؟

٭عشان المصري القديم كان عنده معتقدات أن زهرة الياسمين تعتبر رمز للخلود ورائحة الجنة ..

طب كان المصري القديم مُلزم بزوجته ؟

٭طبعًا كان مقدرها اوي بصراحة و كانت مُلزمة منه التزام كامل ومكنش لأهلها اي دور في الإنفاق عليها بعد الزواج وحتي لو اطلقت منه كان بيديها تعويض مناسب ليها ..طب الطلاق كان بيحصل بسبب ايه ؟

٭العلاقة الزوجية كانت بتنتهي في حالة أن الطرفين اتفقوا علي الطلاق ، أو الطلاق بسبب :

 (حدوث شقاق مستمر أو كراهية بين طرفين ، أو عدم إنجاب الزوجة ، أو ارتكاب الزوجة جريمة الزنا) ورغم أن المجتمع منح الزوج حق معاقبته لزوجته ، إلا انه كان فيه شرط وهو عدم الإضرار بها أو سبّها ، فكان الزوج يتعهد أمام القضاة بعدم إهانة زوجته واذا اهانها كان يُعاقب بمائة جلدة أو ضربة ..

-وكان بطلاق الزوجة تحصل علي كامل حقوقها اللي اتفقوا عليها عند الزواج ، و مش بس كده ؛ دي كانت كمان بتاخد ثلث الثروة اللي كوّنها الزوجان خلال فترة زواجهم ، ولكن لو كان الطلاق بسبب ارتكاب الزوجة جريمة الزنا ، فكانت بتاخد حاجتها اللي جابتها في بيتها بس ، وكانت بتُحرم من جميع حقوقها التانية ..