قصة اخر يوم في حياة كريستيان أتسو ..

تركيا اعلنت انهم لقوا جثمان لاعب فريق هاتاي سبور التركي الغاني “كريستيان أتسو” وقد فارق الحياة ، ضمن ٤٠ الف ضحية لزلزال يوم ٦ فبراير ..

بس الغريب هو قصة اخر يوم في حياة كريستيان أتسو ..

أتسو لاعب غاني دولي كبير وليه انجازات مع المنتخب ، ومسيرته في الدوري الانجليزي كمان ، لعب في بورتو وايفرتون وتشيلسي، ووقع لنيوكاسل ٤ سنين لحد ما سنة ٢٠٢١ راح نادي الرائد السعودي ، واتصاب ، وملعبش غير ٨ ماتشات بس في الدوري السعودي، لحد ما جتله فرصة عقد لمدة سنة في نادي هاتاي سبور في تركيا في سبتمبر اللي فات .

أتسو ملعبش في الدوري غير ٣ ماتشات بس ، والكاس لعب ماتش واحد طول الموسم كله ، وده كان مسببله مشاكل انه ليه مبيشاركش وعلى طول دكة ؟

فا يوم ٥ فبراير اللي فات ، كان ماتش هاتاي سبور وكاظم باشا في الدوري ، قبل الماتش أتسو لم حاجته وحطها في الشنط ، وسابها في شقته في برج rönesans rezidans اللي هوا ساكن فيه في الدور التاسع ، وقرر انه يسيب النادي لانه مبيلعبش فيه كتير ، ويسافر فرنسا يدور على نادي يشارك فيه اكتر ويرجع لمستواه تاني ، وفعلا كان اشترى تذكرة طيران لفرنسا واستأذن المدرب انه بعد الماتش يودع صحابه ويلم حاجته ويسيب تركيا خالص عالساعة ١١ كدة، والمدرب وافق .

واتلعب الماتش ..

الماتش كان تعادل سلبي واداء سيء من الفريقين ، لحد الدقيقة ٨٢ المدرب بيقرر انه ينزل “كريستيان اتسو” بديل ، وبيلعب اتسو لحد انتهاء الوقت الاصلي ال٩٠ دقيقة ، ويحسب الحكم ٧ دقايق وقت بدل ضايع ، لحد الدقيقة ٩٧ يعني اخر دقيقة خالص في الماتش، بيتحسب فاول لهاتاي سبور ، وبيقرر اتسو انه هوا اللي يشوطها ، وفي معجزة غريبة الشوطة بتخبط في الارض وتطلع تعدي من فوق الحارس وتخش جون ، وبيتقلب الحال ..

دا اول جون لأتسو مع الفريق من اول مشاركته خالص من سبتمبر ، وجون فوز حاسم ، وفي اخر دقيقة خالص من الوقت بدل الضايع، فوز مهم جدا يعني مكنش عالبال ولا الخاطر ، الناس احتفلت بيه واخد أتسو رجل المباراة والدنيا شكلها هتظبط خلاص ..

اللي حصل ده خلاه يغير رأيه في قرار السفر نهائيا ، ويلغي رحلته لفرنسا وبدل ما كان هيسافر الساعة ١١ بعد الماتش على طول ، قرر يروح البيت ويكمل في تركيا وهوا فرحان لقراره ده ، وبتخلص الاحتفالات وبيروح أتسو البيت يرص حاجته تاني في الدولاب وينام ، عشان بعد ساعتين بس يحصل الزلزال ، وتقع العمارة باللي نايمين جواه