جميلة

جميلة
بقلم أزهار عبد الكريم
_يوسف إيه رأيك نروح سينما النهاردة نتفرج على الفيلم الجديد
= سينما ايه يا جميلة هو أنا فاضي للكلام ده

_ طب بلاش سينما تعالى نخرج نقعد في اي مكان يعجبك ونغير جو البيت أنا زهقت من القعدة لوحدي

= لوحدك ازاي يعني انت معاكي الأولاد طول اليوم

_ اهه ما أنا عارفه أنا بقول نخرج نفسح الولاد شويه ونقضي كلنا وقت لطيف مع بعض

= وبعدين معاكي يا جميلة أنا مش بتاع فسح وخروج أنا عندي شغل خديهم أنت واخرجي أنا نازل عاوزه حاجه

_ يوسف كنت عاوزه أخد رأيك في موضوع

= لما ارجع نبقى نتكلم أنا مستعجل

_ ما أنت بترجع بالليل متأخر بكون أنا نمت

= اتفضلي قولي عاوزه إيه

_ عاوزه اكمل دراستي واعمل ماجستير ودكتوراة

= بتقولي إيه هو أنت عندك وقت للمذاكرة يا جميلة ده أنت طول اليوم مع الولاد

= ردت جميلة في لهفه ما تخافش مش هقصر مع الولاد في حاجه ولا معاك انت كمان صدقني هقدر أوفق وقتي، الوقت بقى ممل جدآ وأنت رافض اني اشتغل

= أنت كمان عاوزه تشتغلي هو أنا مخليك عاوزه حاجه كل طلباتك مجابه من قبل ما تطلبيها هو أنت ناقصك حاجه

_ أيوه ناقصني ، ناقصنى أنت طول اليوم في شغلك وبالليل مع أصحابك وأنا طول الوقت لوحدي بقى لنا على الحال ده عشر سنين وأنا خلاص زهقت إيه المانع ما أنا هذاكر في الوقت اللى أنت هتكون فيه بره البيت والاولاد لسه صغيرين مذاكرتهم بسيطه مش بتاخد مني مجهود ولا وقت كبير

= طيب براحتك اعملي اللي أنت عاوزاه وسيبيني انزل وأخد الجاكيت من على الكرسي ونزل ورزع الباب وراه

_ نفذت جميلة اللي كانت بتحلم بيه ومرت الأيام بحلوها ومرها

= رجع يوسف لقى جميلة مشغولة بالمذاكره وكل تركيزها في الابحاث والدراسات وكأنها في عزله عن العالم الخارجي وعايشه العالم الخاص بيها فقط

= دخل يوسف وهو يبتسم و يحمل بين ايده كاس عصير وبيقدمه لى جميلة وهو بيقول لها مش كفايه مذاكره كده الساعه أربعة الفجر

_ ردت جميلة بصوت متعب ولكنها حاولت أن تجعله لا يظهر في نبرات صوتها حبيبي تسلم ايدك تعبت نفسك ليه معقول أنت لسه سهران لغايه دلوقتي

= يااااااه ده أنت مش هنا بقى أنا نزلت ورجعت من نص ساعه ودخلت المطبخ اكلت سندوتشين وشربت عصير وقلت اجيب لك أنت كمان معايا لكن الواضح أنك مشغوله لدرجه أنك ما حسيتيش بيا اصلاً

_ أنا آسفه يا حبيبي حقك عليا أنت عارف الامتحانات قربت وبحاول الم المقرر وكمان ما بصدق اخلص مذاكره الولاد وشغل البيت وده بيكون انسب وقت اعرف اذاكر فيه زي ما وعدتك إني مذاكرتي مش هتقصر على متابعتي ومذاكرتي مع اولادي ولا هقصر معاك

= رد يوسف انت شايفه كده احتارت جميله في طريقه كلامه والنظرة اللي في عيونه وما ردتش عليه

= كمل يوسف كلامه طيب أنا هنام تصبحي على خير أنت طبعا هتكملي للصبح كالعاده لغايه لما باص المدرسة يأخذ الولاد

_ جميلة بصوت متردد آه بالظبط سابها يوسف ودخل ينام وهي رجعت تاني على المكتب تكمل مذاكره وتحدث نفسها وتقول هو في إيه ماله متغير ليه ما هو ما كانش عنده مانع إني اكمل دراستي وكمان كان بيشجعني ويساعدني وعمره ما اعترض على حاجه أنا عاوزاها وهي بتكلم نفسها ما هو طول اليوم مشغول في شغله وبيرجع تعبان وينام ويصحى بالليل ينزل مع أصحابه وما عندوش وقت يقعد معايا أو يقعد مع الولاد كل وقته لشغله كنت هعمل إيه يعني لازم املا وقت فراغي ده بحاجه مفيدة
لكن انتبهت فجأة وراحت داخله ورا يوسف اوضه النوم وسألته مالك يا يوسف فيك حاجه متغيره

= بص لها يوسف بنظره كلها لوم وعتاب وقال لها أنا تعبت ما بقتش قادر استحمل دي ما بقتش عيشه أنت تقريبا طول اليوم بره وطول الليل تذاكري و انا انا صبرت كثير و بقول لنفسي معلش يا يوسف سيبها براحتها مش عايز اعمل حاجه تزعلك أو احرمك من حاجه بتحبيها لكن يا جميلة أنا خلاص مش قادر اسكت اكتر من كده وسكاتي ده علشان بحبك و انا عارف أنك عناديه ومش هتغيري رأيك ولما بتحطي حاجه في دماغك لازما تنفذيها ااقول لك انا هغير هدومي وانزل

ونزل وسبها فى دوامه الأفكار
هو مش قادر يستحمل الوضع اللي انا كنت فيه ….

= ألف مبروك يا جميلة على النجاح

_ الله يبارك فيك يا ست الحبايب كله بفضل ربنا ودعواتك أنت وبابا حبيبي

= الحمد لله أديك خلصتي علشان تفضي بقى لجوزك وأولادك

_ عارفه يا ماما انت تعبتى معايا قوي الفترة اللي فاتت وأنا عارفه انى كنت مقصره مع يوسف والولاد لكن خلاص اديني فضيت لهم وهعوضهم عن كل الوقت ده

رجعت جميله بيتها بعد ما اخذت الولاد من عند مامتها وحضرت أجمل حفله علشان تحتفل بنجاحها مع يوسف واولادها وكانت مستنيه يرجع بفارغ الصبر لكن يوسف أتأخر كعادته ولما يأست أنه يجي أخذت الموبايل واتصلت بيه

= رد عليها بصوت متوتر أنا عندي مشكله كبيره في الشغل والموضوع اتحول للتحقيق .. ..

أزهار عبد الكريم