إعدام ميت
نفس العناوين
الصفحه الاولى الغرقانه
بدم اخواتنا في كل مكان
من يوم ما وعيينا على الدنيا
و إحنا بنستنكر من يومها
قاعدين نتفرج ع الشاشه
و ان طال المشهد بندور
على حاجه تسر
ما العرض اتاخد قدمنا
و طاطينا دماغنا و سبناهم
بيعروا الباقي ف اعرضنا
و الفرجة بلاش
معزوم يا حزين على موت أمك
و التورته اتاكلت في غيابك
لحوست صوابعك ع الفاضي
العار بيدور ع العريان
ابليس أتمكن من عرشه
خالك رحال
مفتاح الدار بقى ف النسيان
بقى ذكره أليمه بتتالم
من غير ما يعرق كف ايديك
الدم بيخلص في وريدك
و بيجري مكانه صبغة يود
اهي حاجه تبقع في هدومك
لو مت بلاش
فبلاش تكسرها بسكوتك
و تكون تمثال
قدامك مش من ورى ضهرك
أشلاء مرميه بتتجمع
و كأنك بتجمع لعبة
من ذكرى قديمه لطفولتك
الطين اللي اساس تكوين
اكرملك تتمرمغ
هتسيبه لمين
طب يوم موتك
هتلاقي منين
ارض تضمك وتحن عليك
انا شوفت عيال لسه ف روضه
ادوني دروس
تلميذهم خايف طول عمره
على عمره الجي
بيشيله اخوهم وكأنه
محطوط في النعش
و الزفه تلف ويتباهو
و دماغهم فوق
و يعيدوا اللعبه من تاني
تبديل ادوار
صغار في السن لكن اكبر
من كهل عجوز
بيشمه الموت و بيتشهده
رايحين جابين
طيور م الجنه بتحلق
مع حور العين
و ياعالم مين
هيوصل مين
الكفن الواحد بقى بيشيل
اسره بحلها جوه تابوت
هو إحنا يا ناس
مش بني آدمين
الام تشيل ابنها في شهور
و تشيله تاني لما يموت
الموت مكتوب على كل جبين
و مسيري هدوق من نفس الكاس
و لساني هيبقى شاهد اثبات
مع ان الدود راح يسرح فيه
الموت علشانك يبقى حياه
وحياتك أغلى شئ في الكون
لو تحت ترابك حضنه ألوف
ولاده بتولد بالملايين
البحر بيعلى بعد المد
بيجدد دمه بدم جديد
طوفان الأقصى
اكيد هيبيد
محمود السنوسي
مرتبط
