عصفور
بسلسال معلق يتمرجح .. بين الأهرام
يقطف كرز بلوداني .. و تفاح الشام
تأملت بنظرة طويلة .. وبضيقة عين
بلحظة زاغوا عيوني .. وكثروا الأحلام
حكيت روحي وبسري .. وما بنلام
طلع ع بالي و قلتوا.. كثر الكلام
…. ؟؟ ياعصفور
حسدتك على موقعك .. كيف و وين
ريتني كنت بمطرحك .. بين النهدين
حيرتني كيف بحالك .. حليت الزرين
دمرت العروة والبكلة .. ومالك إيدين
تطير و تتنقل بالوادي .. وبين الجبلين
خطف النهدات يرفعك .. لمح الرمشين
زفرات صغيرة ترجعك .. مابعرف وين
درويش و عامل حالك .. نايم تخمين
تتمسكن حتى تتمكن .. تعمل مسكين
بعيونك ذيب ملاعب .. مكر ملاعين
صرلك مقعد يا مجذّب .. مع الحلوين
!!! من غيرتي ؟؟؟
قلت بحاكي الصبية .. بمشفى الألمان
ردتني بلكنة عربية .. و لهجة لبنان
شو بحكيلك يا خيي .. سحره فتان
عيونا خضر وعسلية .. تتبدل ألوان
خدها بلمحة وردية .. حسن وإحسان
أخذت. العقل مني .. صايبني جنان
وقت تتحسس إيدي .. بلمس البنان
بنسى المرض والعلة .. بطل مرضان ….
د. غانم ع الخوري ..
