سلسلة كان زمان
–—- سلسلة كان زمان
بقلمي
الحِتَّة ام قرشين
اللي كانت ميزانية
غدا وعشا يومين
هي سبب أسعار
واللا ايييه الحوار
البركة راحت فين
يا ما شرينا بيها
واتفسحنا يوميها
دا الأسرة اللي
كانت معاها
مكنش حد قدِّيها
ويقولولك بأعلى صوت
هوا انت متعرفش
انت بتكلم مين
تعالى يا بت يا فاطنة
أو إنت يا واد يا حسين
وخِف رِجلك شويه
هات لنا للبيت خزين
سكر وزيت ورز
ومن اللحمة رطلين
وعدِّي عل عمك وخالك
وشويه من اصحابك
ياكلوا معانا ليلتين
دا البركة كتيرة خالص
والكل هيبقى هايص
متنساش انهم هيسعدونا
في عزق الغيطين
دا احنا ياما خدنا منهم
واللي ف ايدينا ف ايدهم
وبهايمنا هيَ بهايمهم
ولو قعدنا ف بيوتهم
متعرفش مين فينا
صاحب البيت هوا مين
انا فاكر صاحب ابويا
لمَّا كان ييجي عندنا
وابويا غايب وييجي
يلاقيه قاعد ف وسطنا
كان زي ابويا تمام
بحنيتو يلمّنا
ونقعد على حِجْرو
زي خالنا وعمّنا
الأخلاق ما هي كانت زين
الراجل راجل بحق
الكلمة كانت بصدق
مؤدب حتى ف العشق
يدخل البيت من بابه
ويا دوب المهر جنهين
وجهاز العروسة بيشتال
على راس خالة وعمتين
ما هو كان يا دوب تشت
وانْجَر وحصيرة وصحنين
ما هو العريس ليه تمن
بيسد على مرَّ الزمن
بيصرف على بيته
من عرق الجبين
وشرفه هيَ كلمته
وبيته من طين
بس قلبه لونه ابيض
وراضي لو عندو قراطين
فين الزمن فين
الله يرحمك
يا حته بقرشين
بقلمي
رمضان محمد محمود
