ليه البنات بيهون عليهم يدفعوا عرسانهم بالـ 7000 ج للميك اب أرتست يوم الفرح ؟
أحمد أبو سمك
معلش يعني الـ 7000ج متقدريش تجيبي بـ ألفين منهم ماكياج كويس وتحطي لنفسك من غير جو التشطيب والنقاشة ده ، ده غير إن الموضوع مبقاش صعب فيديوهات تعليم الميك اب خطوة بخطوة مالية اليوتيوب والفيس زائد إن الماكياج اللي هتجيبيه مش هيكفيكي ليوم الفرح بس .. دا هيكفيكي سنين قدام ؟
تخيلوا ان في واحدة ميك أب ارتيست حجزها فقط 10.000ج وواحده حجزها بـ 12.000ج ولفة الطرحه ب 2000ج ؟
أنا بقيت أسمع أرقام مهولة في تأجير الفساتين 9000 ، 15.000 جنيه ..
ليه دا كله ؟
ده إيجار ساعتين وهتوديه تاني ؟
ده غير لسه السيشن وفلوس الفوتوجرافر.
هو أنتم اللي مأڤورين ولا أنا اللي مش فاهم
يعني اصرفوا الفلوس دي بس على استفاده حقيقيه، اعملوا اطعام للأيتام والفقراء بنية بركة الزواج ، احجزوا لعمرة ، اعملوا وليمة ، سافروا بيهم ، تكلفة الفرح بالهيصه ، تسفركم بلد اجنبي سياحه ، وهو تبقوا عملتوا حاجه تقريبا مكنتوش عمركم هتعملوها وهتتبسطوا جدا..
بجد مش متخيل إن ميك اب وليلة توصل ل 50 ألف وساعات اكتر ومش ببالغ.. وتيجي العروسة في نهاية اليوم تغسل وشها وتلاقي كله بيقع في الحوض وحاجه اخر قرف ؟
” أقلهن مؤونة أكثرهن برَكة “
