« رغيف العيش »
يا كتاب نازل من السما….
ما سلمش من التحريف…
يا نعمة من ربنا….
يا قوت الغلبان والضعيف…
يا رغيف… يارغيف…
ياغالي علي قلوبنا…
وعلي جيوبنا حنين وخفيف..
كل ما ابص عليك افتكر ايام زمان واتحصر….
وانت عمال تصغر وتصغر وتصغر…
وكله عليك بيتشطر…
يا ابو لون شاحب ونحيف…
خلاص الجنيه…
اترحمنا عليه…
بعدما عام من غير تجديف…
عمال ليه تصغر وتكش….
كانت ليك هيبه وبتعملنا كرش…
انت زعلان من مين….
من الفقرا ولا المسئولين…
ولا ذنوب بتخلص منا وما بتتغفرش…
ولا بتمسح ريق ولا بتشبع…
وجنيهنا كل يوم يتذل قدام الدولار وبيوطي وبيركع….
وزى ما عام الجنيه وما بقلهوش قيمة ووزنه خفيف…
بكرة تعوم انت يا رغيف….
ويكتبوا عليك الرغيف ضار جدا بالصحه خليك بالجوع اسلم ونام انت وعيالك خفيف…..
الرز بقي حلم حياتي….
انا في عيد جوازي قدمته هديه لمراتي….
ولما جيبنا قزازة زيت…
جوم باركولنا جيران البيت….
وبطلنا نشتري خضار …
علشان نحارب الاسعار…
وعايشين علي البقوليات…
بناخدها كل ست ساعات…
واللحمه المفتريه…
ما بتشوفهاش عيالنا غير علي عيد الضحيه…
يارغيف… يا رغيف….
يا ابو لون شاحب ونحيف…
خايف لبكرة عليك اتشحتف…
وكل ما اشتاقلك ابص في صورتك او اروح أزورك في المتحف…
واكتب عليك في اشعاري وروياتي….
وأعملك صورة واعلقها علي الحيط جمب صورة ابويه وامي وحماتي…
خايف علي مر الايام…..
تتباع زي الدهب بالجرام….
او يكتبك الدكتور للعيانين في روشته…
وتبقي ممنوع في كل حته…
وفيه منك الاصلي والتزيف…
يا رغيف….. يارغيف….
احمد ماهر ابو نورا
شاعر الصعيد…
