ياريتنا ما كبرنا ، لانو قعدت العيله تغيرت ، صارت كلها وايرليس وانترنت ونبعت فيديوهات لبعض ، لا في حاكم جلاد ولا حيوان جماد ولا ابو عواد!
اقسم بالله ياريتنا ما كبرنا ، لانو ما كنا نفهم ، وحاليا ما بزبط نكون بنفهم ، زمان كنا اكتر اشي نفهم فيه كيف نجيب قناة سوريا طبع ، او نستأجر كاميرا فيها ٣٢ صورة ! كان الفنان فينا اللي يقدر يلعب اتاري ببلاش!
حتى ما كنا نعرف نزعل ، اصلا فش زعل ، لانو كلنا جنب بعض ، هسا اذا زعلت من حدا بتعملو بلوك ، وبتكتب عنو بوست!
حتى الاكل صار غير ، الملوخيه تغيرت والمقلوبه صارت ابصر كيف ، والسلطه صارت مليون نوع ، وصار في خبز جديد للريجيم !
اصلا بطّل يرن جرس البيت ضيوف فجأة ، والكل ينعجق ، ونضّب الاكل ، هسا لازم يوخد موعد عالواتساب قبل ب اسبوع!
ياريتنا ما كبرنا ، ما كنا نعرف شو يعني تنمر ، وطاقة ايجابيه ، والوان قوس قزح ، وما تصرخ عالطالب عشان نفسيتو ، وما تشرب مي من الحنفيه مشان ما تتسمم!
ياريتنا ما كبرنا وشفنا ولد عمرو ٥ سنين بغني : اكبر غلطة بحياتي ، عليت واحد واطي!
كان كبيرنا نحفظ اغاني افتح يا سمسم ، ويا ابو عواد ابو عواد ، عامل عنتر بن شداد ، حامل السلم بالعرض ، انت بواد واحنا بواد!
يا ريتنا ما كبرنا ، وما شفنا الاواعي اونلاين ، بطلنا نروح عالمحل وامي تخلينا نقيس ، وفش غرفة غيار بمحل الاواعي ، اشلح يا كلب ، وانتا وجهك احمر ومستحي ، يا
يا ريتنا ما كبرنا ، لانو زمان الاواعي لازم تكون كبيرة عليك ، مشان تخدم ل اربع اعياد !
والبلوزة تلف عكل الاخوان ، وبوت الاصابع يخدم طول العمر!
هسا لا احنا فاهمين عالصغار ، ولا الصغار فاهمين علينا ، وفش حدا فاهم اشي!
