كتبت الدكتوره ياسمين عبد الحق مقال عن جرثومه المعده وأعراضها وكيفيه علاجها والوقايه منها.
كتبت الدكتوره ياسمين عبد الحق مقال عن جرثومه المعده وأعراضها وكيفيه علاجها والوقايه منها.
تقريبا معظم الشعب عنده جرثومة المعده وميعرفش
اي هي جرثومة المعده وكيفية علاجها والوقايه منها
______________________
س – إيه هى جرثومة المعدة ؟
– ج – دى عبارة عن بكتريا تدخل الجسم عن طريق الاكل والشرب وتفضل عايشة جوه القناة الهضمية بتاعتك . بيسموها الميكروب الحلزونى او جرثومة المعدة ( H.pylori ) …
_________________________
س – هل منتشرة بين الناس ولا محدودة فى ناس معينة ؟
ج – منتشرة جدا بينا كلنا .. تخيل مثلا لو عددنا ٩٠ مليون فى ٦٠ مليون معرضين للإصابة بيها
( حوالين تلتين السكان )
___________________
س – طيب هل تعمل قرحة مع كل الناس ؟
ج – لا غالبا مش بتعمل مشاكل مع كل الناس لكن الناس اللى عندهم مشكلة فى المعدة زى التهاب هتعملهم قرحة …
_____________________
س – طيب بتدخل الجسم إزاى ؟
ج – بتدخل مع الأكل والشرب ..
– الأكل اللى مش نضيف او اللى مش مطبوخ كويس يعنى ني شوية ولذلك بتجي لمعظم الناس اللى بياكلوا من المطاعم خصوصا لو مطعم مش نضيف او الأكل مش مطبوخ كويس …
– الشرب طبعا اللى مش نضيف وطبعا مصر المية بتاعتها ملانه بكتريا عشان نظام الصرف عندنا داخل مع الرى ومع الشرب …
___________________
س – طيب دخلت خلاص ها وبعدين بتعمل ايه فى المعدة ؟
ج – ممكن تفضل سنين فى جسمك بدون مشاكل وطول الفترة دى واحدة واحدة تبدأ تهاجم بطانة المعدة والأمعاء وتعمل تآكل فيها زى جرح كده فلما المعدة بتاعتك تفرز حمض ال HCL اللى بيهضم الأكل يقوم يروح على المناطق المجروحة دى ويعمل قرحة معدة …
______________________
س – طيب لو انا عندى قرحة نتيجة جرثومة معدة هحس بإيه ؟
ج – هتلاقى عندك ألم فى بطنك ومعدتك فاضية وأنت جعان ولما تاكل الألم يخف شوية ويرجع يجى تانى بين الوجبات ..
– دايما عندك إنتفاخات وغازات ..
– هتحس بغثيان وممكن ارتجاع ..
– وزنك هيقل فجأة بدون سبب …
___________________
س – ايه العلامات اللى اخاف منها الخطيرة ؟
ج – لو فى دم فى الموضوع ..
– سواء دم فى البراز احمر او البراز لونه اسود ..
– او لو رجعت دم ..
– او لو الالم على طول مش بيروح او حاسس بتعب شديد وتوهان ..
___________________
س – طيب إزاى اتأكد إن عندى جرثومة المعدة ؟
ج – باالتحاليل أعمل تحليل H.pylori سواء فى الدم او البراز ..
او الطريقة التانية بالمنظار ..
__________________
س – طلعت موجوده عندى ايه العلاج ؟
س – غالبا العلاج بيكون ١٤ يوم
بتبدأ .. بالعلاج الثلاثى ..
اوميبرازول ٤٠ مجم حبة قبل الفطار وقبل العشاء
مترونيدازول ٥٠٠ مجم صباحا ومساءا بعد الاكل
كلارثرومايسين ٥٠٠ مجم صباحا ومساءا بعد الأكل
كمل ١٤ يوم بنفس الجرعات
بعد ١٤ يوم كمل على الاوميبرازول بس ..
وفيه حبوب هيليكيور بردو لعلاج الجرثومه وممتازة
_____________
س – امتى اعمل تحليل اتأكد راحت ولا لأ ؟
ج – بعد شهر من العلاج ..
____________
س – طيب هل فى ادوية بتأثر على نتيجة التحليل ؟
ج – ايوه المضاد الحيوى لو بتاخدوا وروحت عملت تحليل هيطلع سالب عشان كده قبل ماتروح لازم توقف المضاد الحيوى إسبوعين على الاقل قبل ماروح …
____٭_________
س – إزاى أحمى نفسى وأولادى من جرثومة المعدة ؟
ج – النظافة ثم النظافة ثم النظافة …
– لما تدخل الحمام أغسل ايدك كويس وانت خارج ..
– قبل ماتاكل اغسل ايدك كويس …
– الاكل يستوى كويس بلاش أكل نى وبلاش اكل مطاعم ..
– بلاش تشربوا من مية الحنفية او اشترى فلتر فى بيتك ينقى الميه ..
– بلاش عصبية او ضغط عصبى او تدخين او خمرة …
_____________
س – طب ايه الاكل اللى ياكله مريض جرثومة المعدة ؟
ج – الصبح حليب بالعسل او ميه بالعسل على الريق ..
– وجبتك يكون فيها خضروات وفواكة وحبوب كاملة …
– بالليل عشاء خفيف فيه علبة زبادى …
– بلاش تاكل كتير مرة واحدة وكل وجبات صغيرة اكتر من مرة ..
– بلاش فواكة حمضية زى الليمون واليوسفى والبرتقال ..
– بلاش مقليات بزيادة او اكل مسبك بزيادة ومليان دهون …
– بلاش بهارات او حراق بزيادة
– بلاش شاى او قهوة خصوصا علي معدة فاضية …
–
#ط أتمنى أكون جاوبت على كل التساؤلات اللى بتدور فى ذهنكم ..
متنسوش الرجوع لمختص قبل البدء بالعلاج.
