نِفسي يا نَفسي مَرَّة
تقولي لي انا ابقى مين
واسألها ازاي يا نَفسي
سايباني في الأنين
كَرهاني ولا حَبَّة
طَعم مَرار السنين
حَبّاني ولا كارهَة
أفرح لي ولو يومين
أنا حَد بالفعل صالح
وشاب مَجدَع وزين
ولا في الأصل طالح
مِتدّاري بالتَزيين
أنا كلمة حَق تاهِت
في زحمة كَدّابين
ولا لوني اللي باهِت
مش باين لأي عين
أنا ثعلب جوا غابة
ولا مُخلِص أمين
أنا قِمَّة في الطيابة
ولا مِ الغَدّارين
أنا لسان الغلابة
والناس الشقيانين
ولا صوت الديابة
والظَّلمَة والسلاطين
جاوبيني قوام قوليلي
أنا مين وليه وفين
ولو توهت إندهيلي
ومِدّي لي الإيدين
كل اللي كان باقي لي
وَدَّع وفاتني حَزين
تحرير دعاء نور
