لما جيت اكتب قصيدة
قلبي وقفني انتباه
قالي انسي اي حاجه
لما تدخل في الصلاة
انسي اهلك ويا روحك
وافتكر بس الاله
هو بيداوي في جروحك
لما تبقي في يوم معاه
داالعمل ويا الفريضة
هما دول طوق النجاة
لما جيت اكتب قصيدة
قلبي وقفني انتباه
الحروف دايما تعاند
وتخاصمني بالسنين
وتعاتبني ليه يا شاعر
الكلام بيكون حزين
قلت ليهاغصب عني
ان قلبي يكون حزين
من اللي كان دايما يعدي
واللي عيشته من سنين
واللي دايما كنت اشوفه
من الام المجروحين
الغلا دمر جيوبنا
والغلابه مفلسين
الفقير دايما يعاني
والغني بيموت تخين
ياكلوا من اكل الغلابه
والغلابه ياكلوا طين
يسرقونا في كل حاجه
ويتهمونا في الطحين
ردي يا حروفي عليا
ياللي بتلومي الحزين
هو كان ينفع يا ساده
ولا يبقي في شرع مين
رقصونا علي الربابه
شحتونا في الحسين
اكلونا للديابة
عيشونا ميتين
خلوا كل الدنيا غابة
خلوا كل الناس غلابة
موتوا فينا الجنين
ردي يا حروفي عليا
ياللي بتلومي الحزين
…………….
