يجعله عامر

يجعله عامر

كتب/سعيد ابراهيم

تسمحولي أفضفض معاكم بكلمتين

بصراحه كده الدوله ماينفعش تعمل مشاريع وتصرف كل هذه المليارات

الدوله ماينفعش تعمل مشاريع كبيرة مثل القطار السريع المونوريل والمواني الجديدة وتبنى مصانع وتبنى مدن كبيره عالمية مثل

العاصمة الإدارية والعلمين الجديدة

علشان كل ده هيخدم الناس الأغنيا اوي و المبسوطين والكلاس

أنا رأيي بقى إن الدوله تبطل تعمل مشاريع و تحلّ الوزارات و الهيئات و الشرطه والجيش وكل الأجهزه دي وبلاش وجع دماغ

والحكومه كل يوم الصبح تصحى من النوم تغسل وشها و تدّي لكل مواطن مصروفه في إيده , يعني ميزانية الدوله تتقسم علينا و ناخدها مصروف يومي أو شهري , و احنا ناخد الفلوس و نعمل بيها اللي عايزينه , عايزين نعمل مترو أنفاق ماشي , نعمل قطار سريع ماشي , نعمل مونوريل ماشي , نبني مدن جديدة ماشي , نعمل مشروع سياحي في جزيره ماشي , نرصف حته في شارع ماشي , نعمل فاسقيه ماشي , نستورد بالفلوس لبان دكر ماشي , و نلم من بعض و نعمل المشروع اللي ييجي في دماغنا ولو اختلفنا نفركش الموضوع , و كل واحد ياخد فلوسه , و لو اتخانقنا بقى و احنا بنقسم الفلوس تاني نروح القسم و نحتكم لدولة القانون , بس هنروح القسم مانلاقيش حد ( لأننا سرّحنا الشرطه ) و ندور على دولة القانون مانلاقيهاش , ولو حد إعتدى علينا نلم من بعض ونأجر ناس تحمينا

( لأننا سرّحنا الجيش)

وبعدين ندور على عقد عمل و نسافر السعوديه , و نجيب مروحتين و احنا راجعين , نبيع واحده و نخلي التانيه معانا و نبقى كأننا خدنا المروحه بتاعتنا ببلاش , اه و عهد الله زي ما بقول لكوا كده

وبلاها دولة وبلاها مشاريع

انا بقول الكلام ده علشان مصر فيها ١١٠ مليون خبير في كل حاجة

الدولة عليها ضغوط اقتصادية ضخمة من القريب قبل الغريب ، إعلام اقليمي ودولي بيشكك في اي حاجة ، هبيدة السياسة الداخلية والخارجية اللي ما بيصدقوا يشوفوا اسم مصر في اي خبر فيعملوا عليه 15 حلقة يوتيوب ، نشاط عملاء الحريات والديموقراطية ، تحديات في السودان وليبيا وحرب في شرق أوروبا وفي حرب زيها بتجهز في وسط افريقيا ، الدايرة بتضيق كل شوية ومحدش عايز ياخد باله!

والأهم إن محدش فاهم ولا عايز يفهم في نفس الوقت ، محدش بيكلف خاطره ويفتح الخريطة ويترجم الأخبار اللي بيسمعها ويشوف إنعكاساتها إيه على مصر وعلى اقتصاد مصر!

ربنا معاك يا ريس ، أصعب من كده وعدينا منه بفضل الله ، شوف الصح ايه واعمله وهتلاقينا كلنا معاك بإذن الله تعالى

ويجعله عامر.

#حفظ_الله_مصر