حِكَايةْ عَمِّى السَّنانيري

حِكَايةْ عَمِّى السَّنانيري

بقلم ـ دكتور / محمد سيد الدمشاوي

ويْمُرّ الليلْ مِنْ بعد الليلْ
وحكاية عمى السنانيري اللّي تهدّ الحيلْ
عمال تتبحتر طول الليلْ
قصة ومواويل
وبكا وأحزان
وكأنها سيل
ينزل في دموع الناس
يشفي المجروح
ويطيب خاطر كل عليل
دي حكاية غريبة عجيبة
لا ليها بداية ولا نهاية
ولا ليها مَثيلْ
عَمَّال يحكيها بقاله سنين
ونقوله: .. خَلاصْ ؟
يضحكْ !! …
ويموت م الضحك !!

ويْقُولِّنا: كِيفْ ؟
دا انا لسه هَقٌول الصّبح حكاية سِيفْ
وحكاية عَمِّى الشبراوي بيّاعْ الكِيفْ
وحكاية الخوجة اللي اتصاحب مع ملك الجانْ
وهقول حكايات محمود، وحسين، وزينات، وجيهان …
وبقية قصة شعب زمان وزمان وزمان…

* * *
عمى السنانيري الحكواتي …
صندوق حكايات
راجل مِتعوِّد ع الحكايات
ولسانه فصيح ْومليح
يدخل ع القلب بجَدْ
وحكايته طويلة طويلة…
طويلة بجَدْ
يطلع من حَدْ يرُوح على حَدْ
ما بتعرف يحكى خيالْ ولا جَدْ
ولا هُوَّ بيسكت ولا يِنْهَدْ !!
لكن في حكايته تلاقى حاجاتْ وحاجاتْ
هتلاقي حياة ومماتْ
وتلاقى عِبر وعظاتْ
وتلاقى فَرحْ
وتلاقى بُكا وأحزان
ودموع تنزل على الخَدّْ
وتحس بصوته اتبحّ ، وراحْ ، وانْسَدّْ
ويغيب ع الوعى
ونقول دا خلاص أهو ماتْ
أهو ماتْ !!
مِين اللى هيحكي الليل الجاي ؟!
مِين اللي يسِدْ ؟!
ويعود من تاني ويحكى حكايته اللي ما تخلصْ
ولا يوم تِتْحَدّ

* * *
عمى السنانيري دا واحد كده لله ف لله
ما بتعرف عايش فين
ولا فين متواه
يطلعلك فجأة كأنه ملاك
أو واحد كده ملبوس بالجن
وفيه مليون عفريت جواه
يضحك … وتحس ف صوته بيبكي
يطلع من قلبه زفير معجون بالحزن
وكلمة آه
وتحس في صوته انه دا مجروح
ووراه حكايات … أساطير…
مواويل …بترد الروح
* * *
عمى السنانيرى حكايته حكاية
الناس بيقولوا : أنه دا مجنون
مسكونْ بالجنْ
وفى ناس بيقولوا دا واحد عادى من الأحرارْ
ويقولوا دا حَضَرْ الثورة مع الثُّوارْ …
ضد المُحْتَلّْ
أخدوه فى الحَبْس سنينْ وسنينْ
دول فِضْلوا يكهربوا جسمه شهور وشهورْ
ودراعه من التعذيب انْشَلّ
والعقل اخْتَلّ
لكن فى حقيقة الأمر
انا حاسِسْ أنه وراه أسرارْ
وهييجي نهار …
يكشف عن سره اللي ماليه حَدّْ
عمى السنانيري تحس بأنه تاريخ مفتوحْ
وتحس ف طعم حكايته جروحْ
وتحس بظلم شديدْ وأكيدْ
وتحس بأنه يا عيني انْهانْ وانْذَلْ
عمى السنانيري دا لغز غريبْ وعجيبْ
أصعب م الصعبْ
ولا تعرف أصله وفصله مِنِينْ
ولا رايح فينْ
لكن بصراحة دا واحد فعلا ملهوش حَلْ

* * *
عمى السنانيرى دا راجل طيب وبيتحَبْ
وحكايته حكاية عجيبة غريبةْ
تخشّ القلبْ
عمى السنانيرى … حكايته حكاية شَعْبْ