حق انتفاع
نادي بعزمك ، و اتفرد
أصرخ في وجعك قول ، مدد
مش كل حزن ، بيتولد
تلقي اللي فيه ، صابه الجلد
و يشد من قلب السما
سحابة ماشية معتمة
يتداري فيها ، كأنما
ضلاية ، بتطبطب عليه
حق انتفاع الصبر ،،
مملوك للطيبين
حق الحنين ،، للكهل
،لما كان بذرة جنين
و اللي شاف لما طاف
قلوب كتير مُعذبين
و اللي رمم ، وقت وجعه
كسر نَفس المجروحين
و اللي طبطب ، ع الوجع
و اتخدع بين السنين
حق انتفاع الصبر ، مسموح
،، لدموع . الحزين
ف ما تدعيش ، الصبر
و انت ضمن الخسرانين
و ما تبتليش العمر ،
أنه عدي عليك ، أنين
و اوزن في قولك الكلام
يومها تعرف انت ، مين
بص ف مرايتك ، اعرف
حقيقتك قبل ما تقول هما فين
راح تشوف ، مجاريح كتير
و انت ضمن المجروحين
*******************
شعر / ياسر عبد الحميد
*******************
