تعلم فن سيطرة التحكم فى مشاعرك

تعلم فن سيطرة التحكم فى مشاعرك 

بقلم الكاتبة : سلوى عبد الكريم

‏كلاهما أولى بالرعاية حماية نفسك من مشاعرك السلبية وحماية نفسك من مشاعر الناس المؤذية ممن حولك

علشان نقدر نتحكم أو نحمي أنفسنا من مشاعرنا أو مشاعر الناس السلبية والمؤذية ممن حولنا لازم نعرف وندرك تماما وهذا شيئ بالغ الأهمية

أننا لم نحيا فى يوتوبيا المدينه الفاضلة وأننا لن نحيا وحدنا فى هذه الحياه لأنك خلال يومك وطول ما أنت ماشى بتتعامل مع صنفين مختلفين من البشر بمختلف صفاتهم وخصالهم

الصنف الأول

وهو السوى المسالم المتصالح مع نفسه ومحب الخير للغير إنسان كده كيوت فى نفسه فسلاماً منه وسلاماً عليه وله كل الدعوات الطيبة

والصنف الثاني وهو المعقد والمريض نفسياً والحاسد والكاره والحاقد على البشر

وهذا النوع من الناس طول ماهو ماشي بيخبط فى البشر وبيسقط عليهم مشاكله ومرضه وعقده النفسية

*وهنا تحديداً يأتي دورك أنت فى حماية نفسك من مشاعرك المشبعة بكل مايحيط بها من مشاعر الناس السلبية ممن حولك *

** فهنا لازم تنتبه وتدرك تماماً وتكون على وعي كافي أن لو أحد من هذا النوع المريض ظلمك أو دايقك أو هانك أو جرحك

تيقن إنه هو اللي غير سوي هو اللى مليان ومحمل بالمشاكل والعقد هو اللى غير محترم وغير متزن نفسياً مش أنت فمتجذبش منه طاقتة السلبية وتمتص منه عقده ولا تحمل نفسك مشاكله

** كل ما يجب عليك فعله إنك تفرغ من جواك طاقته السلبيه وماتستقبلهاش جواك وأغسل نفسك من الغضب والزعل والحزن الذي يعتريك من جراء فعله معاك علشان تقدر تعيش حياة سعيده مستقره

** وهذا يتمحور فى أربع إتجاهات **

1/ إنك تدرب عقلك إنه يوصف مشاعرك فى تلك اللحظة وتسمى مشاعرك وتبروزها أمامك أياًكانت تلك المشاعر لو غضب قول أنا غضبان أنا خايف أنا حزين

لأن تسميه المشاعر ووصفها فى حد ذاتها بتساعد عقلك على استيعاب الحدث اللي بيحصل وادراكه

ثم أنطق بلسانك رغبتك المضاده لحالتك بمعنى لو خايف قول أنا مش هخاف انا مش هغضب انا مش هحزن انا مش هزعل فمن أقوالك أقدارك فتوقع دائما ما تتمنى وداوم على النطق به فأنت بذلك بتدعم نفسك وبترسل لعقلك طاقة إيجابية وإشارات بإنك قوى مش ضعيف ,,

2/ تاني حاجه إستثمر وقتك فالوقت أغلى مايمتلكه الإنسان وأشغل وقت فراغك بطريقه صحيه تتعامل بيها مع مشاعرك

فبعض الناس بتلجأ للنوم الكتير أو الأكل الكتير أو الشكوى أو الإسقاط والهجوم أو التبرير الدائم وده أسمه هروب وحيل دفاعية سلبية فالأحسن نبدلها بحيل دفاعية إيجابية مثل :

إستثمر وقتك وقسمه وأعمل تمارين للتنفس، وتمارين رياضيه،

لو بتحب القرأة اقرأ, لو بتحب الرسم ارسم, لو بتحب الكتابة أكتب , أتأمل , لون أي حاجة بتبسطك أشغل نفسك ووقتك بكل ماهو نافع فإن لم تشغل نفسك بالحق والنفع شغلتك نفسك بالباطل ,,

3/ ثالث حاجه أهتم بنفسك أشبع نفسك وجسدك بإحتياجاتهم الأساسية من مأكل اهتم بصحتك حاول بقدر الإمكان أن يكون أكلك صحي ووزنك مناسب ، من مشرب عليك بقدر كافى من المياه يوميا، من إشباع رغباتك واحتياجاتك المشروعة ,,

راقب وقت نومك كل ما أخذت عدد ساعات كافيه من النوم تأثيرها على صحتك وجسمك وشكلك هيكون أفضل،،

4/ رابع حاجه جانب الروحانيات والعبادات فى حياتك أخبارها و مستواها إيه هل بتأديها بقلبك ووجدانك وروحك ولا مجرد قيامك بها بجوارحك فقط هل صلاتك بتستشعر معنى ارحنا بها يابلال ولا مثل نكر الديك وأجري على لهو الدنيا ، هل لك ورد يومى من القرأن ومناجاة الله أم غافل فاعدل واعتدل كى تستقيم الحياة ،

وأخيراً أوصي نفسى وأوصيكم بلأربع جوانب السالف ذكرهم

فكلما أحسنا إدارتهم واستثمارهم كلما انضبطت عجلة توازنا فى الحياه بشكل أفضل بكتير وكلما أختل فيها جانب كلما كانت حياتنا مضطربة منقوصة وغير متكاملة،،

فحافظ على نفسك وعلى مشاعرك حاول بقدر الإمكان إنك ما تخليش حاجه تأثر فيك وتأذيك أو تضايقك ساعتها هتبقي حاسس انك أقوى وطاقتك اللي محوطاك فى الأتجاهات الأربعة هتبقى أحسن وأفضل ..

وختاماً دمتم فى تمام الصحة النفسية والعافية الجسدية أحبابي الكرام ولكم منى خالص حبي ومودتي ..