كُتر العَشم
كتر العشم خلا المناظر تترسم
و بتتقسم علي شكل بايخ
ف بلاش تزيد في محبتك
و تقول كلام بقا طعمه ماسخ
الدنيا مخبوطة بحجر
كل اللي ماشي فيها دايخ
و بايننا في رحلة سفر
أكم ما فينا بيحتضر
و اللي اختصر كان مقتصر
من يوم ميلاده و هو شايخ
ف ما تدعيش انك ملاك
و انك بتخلص م الشباك
قبلك مِشيوا ، ف طريق هلاك
مالقوش مكان ليهم هناك
قالوا ، عليهم ، أوليا
كدبوا ، كدبة و صدقوها
زودوها و بنفاقهم فرقوها
لما ،،حاولوا ،،يلحقوها
كدبوا ، تاني و غرقوها
و انت واقف ع الحياد
دفتر للأحوال في ايدك
و ايه يفيدك م العباد
و تعكر الدم ف وريدك
كُتر العشم ، ذَل الغلابة
حتي الغنم صبحوا ، ديابة
و اللي اتقسم قوس الربابة
و انت أكتفيت بالمشاهدة
كمل سكوت و بلاش معاندة
