سهير يوسف تكتب عن الأتنين اللى فى الصور دول يبقوا من اكتر الفنانين اللى اثاروا الجدل فى الوسط الفني وبرة الوسط الفني

سهير يوسف تكتب عن الأتنين اللى فى الصور دول يبقوا من اكتر الفنانين اللى اثاروا الجدل فى الوسط الفني وبرة الوسط الفني.. خصوصاً مع الكلام الكتير عن دياناتهم.. وسبب غيابهم المفاجئ عن مصر ومع الإشاعات الكتير اللى كانت بتقول من فترة للتانية أن واحد منهم يبقى رأفت الهجان الحقيقي..

اللى فى الصورة يبقوا “جمال وميمو” رمسيس .. أو جمال ومحمد رمسيس .. ومن الاسامى دى تقدر تفهم أنهم مكنوش يهـ.ـود ولا حاجة زى ما اتقال عنهم فى أكتر من مكان.. وانما كانوا مسلمين..

طيب إيه حكايتهم بقي؟؟ أقولك

جمال ومحمد اتولدوا فى المنوفية.. لأب كان شغال نجار فى فرقة مسرحية بتجوب الاقاليم.. اتولد جمال فى 1920 ومحمد فى 1921 .. وبعد شوية اتنقلت الاسرة هيلا بيلا على القاهرة وقعدوا فى حى شبرا وشكلوا فرقة سيرك عائلي أطلقوا عليها اسم “سيرك رمسيس”..

على عكس ما ناس كتير متصورة شهرة جمال ومحمد بدأت برة مصر وبعد كده اشتغلوا فى مصر..

بدأ المشوار الحقيقى للأخوين لما سافروا بعد الحرب العالمية التانية واستقروا فى باريس واشتغلوا هناك فى مسرح من المسارح .. ولما نجحوا وتفوقوا صيتهم سمع .. وبدأت المسارح التانية تدور عليهم لحد ما المنتج الفرنسي “البير باربير” اتعاقد معاهم على الظهور فى فيلم قصير اسمه “ليلة فى باريس” وظهر الاتنين فى المشاهد الاستعراضية اللى ضمها الفيلم.. وحققوا نجاح كبير خلاهم يشاركوا بعد كده فى حوالى 7 افلام فرنسية مع كبار النجوم وقتها.. فيه لينك منها فى اول كومنت..

وبما انهم كانوا بيعرفوا 7 لغات بقى يجي لهم عروض من دول تانية.. وشاركوا فى اول فيلم بلجيكي تسجيلى بإسم “الرجل الذى لم نكن ننتظره” وفى الفيلم ده جمال عمل دور البطولة.. ومحمد اللى كان اختار لنفسه اسمه “ميمو” عمل دور الغريم..

بعد ما حصل العدوان الثلاثي على مصر اتنقل الاتنين لامريكا وهناك عملوا عروض على المسارح الامريكية ومنها الى السينما والتلفزيون لحد ما بقوا معروفين عند كبار النجوم وفيه منهم اللى كان بيطلبهم فى أعماله بالاسم..

بعد فترة ولاسباب محدش يعرفها رجع الاخين على مصر وشاركوا فى افلام “اشاعة حب واسماعيل ياسين بوليس سري وملاك وشيـ.ـطان”..

وقال جمال وميمو فى حوارهم مع مجلة الكواكب أن موهبتهم أوحت للمنتج جمال الليثي بفكرة فيلم عنوانه كان هيبقى “إسماعيل يس في تكساس” وكانوا هيظهروا فيه مع إسماعيل يس في أدوار الكاو بوي.. بس المشروع وقف ومخرجش للنور..

وفى 20 نوفمبر 1961 نشرت مجلة الجيل خبر ـ بيقول ان الاتنين وبعد ما جربوا حظوظهم فى مصر وبعد ما اكتشفوا ان الادوار اللى بتتعرض عليهم صغيرة قرروا انهم يسافروا الى امريكا خصوصا بعد ما تلقوا عرض من بيري كومو احد ملوك البرامج الاستعراضية فى التلفزيون الامريكي علشان يشتغلوا معاه هناك .. وده بيرد على اللى قالوا انهم اتطردوا من مصر بسبب ارائهم السياسية ..

وبحسب المصادر.. الاتنين وبعد فترة من الشغل فى السينما والتلفزيون بين أوروبا وأمريكا استقروا فى بلجيكا وفتحوا هناك ملهى ومطعم.. واتجوز جمال من بنت هولنديه.. وبعد ما ميمو مات سنة 1979.. اتنقل جمال لهولندا واستقر مع اسرته وفتح مرسم و فضل فى هولندا لحد وفاته فى 2002..
cpd