لفوق طااايرين

$ لفوق طااايرين $
بقلم/عماد الأبنودي
•••••••••••••••
مالك ياااا دنيا مغلبانه
و بتقلبينا على الجانبين
وسعدك ليه حرم لقانا
اكمنى .. قلوبنا طيبين
بنعافر فيكي و نقول ماشي
و بقليلك يادوب راضين
تزودي حمولك مايجراشي
غصبن عننا متحملين
أحلام الورد مالها خيال
سكتها بعيدة على المغرمين
بيدور جوانا ياما سؤال
إحنا شايلين ذنب مين …؟
مش كفاية ماليه علينا
بتمرمطي فينا من سنين
ليه بتطلعي غلبك فينا
‏نكونش إحنا مش بني آدمين
ضميرك مالو ماهوش سليم
بتختاري كفة الطمعانين
يكونش مابيبنا حساب قديم
و جايه تكملي الكيل أنين
حلمك علينا بس شوية
وإضحكي ضحكة الخداعين
اوهمينا إنك … هنية
و إن حبالك مش دايبين
خلي حظك مرة يزورنا
و يخلينا مرة مبسوطين
ولا هناكي يقع ف غرامنا
و يقولوا عننا عاشقين
ليه و ليه ماشيه عكسنا
و موجك يغرق الغلبانين
يعني لو قلبك بيحبنا
مش كان زماننا لفوق طايرين
،، بقلم ،،
عماااد الأبنودي
‏27 , 4 , 2024