هناء عزت :النقد الايجابى هو نقد السلوك وليس الشخص
هناء عزت :النقد الايجابى هو نقد السلوك وليس الشخص
يعد موضوع الرد على النقد من الموضوعات الهامة لتكوين الشخصية حيث يعانى
العديد من اازمات نفسية بسبب عدم ردهم على انتقاد الاخرين لهم سواء على المستوى الاجتماعى او المهنى وبعض الاحيان يتم الرد باخطاء لذا كانت فكرة ظهور كتب وكورسات للتدريب على الرد للانتقاد وهوموضوع مهم للوزراء والسياسين والشخصيات العامة الذين يتعرضون للنقد سواء فى المؤتمرات او على السوشيال ميديا فن الرد على الانتقاد هو محور لقاءنا مع هناء عزت مدربة فنون الكلام والرد التى تعتبر من اهم المتخصصين فى هذا المجال
ماهى مميزات تعلم فنون الرد على الانتقاد؟
مهارة الرد لما بنكتسبها بنحصل على مميزات وفوايد كتير جدا منها :
1 شعور بالحرية وقدرة عاليه على التعبير والكلام
2 الدخول في حوار ونقاش مع الاخرين والتعبير عن الرأى الشخصي ووجهة النظر
3 زيادة الثقة بالنفس
4 بينتهى الشعور بالإحراج والخجل لو اتقال حاجه والشخص معرفش يتعامل
5 يقدر ينتقل الشخص من موقع الدفاع عن نفسه لموقع الهجوم بكل سهوله
6 تقدير ذاتى عالى
7 القدرة على الفوز في الحوارات والمناقشات بعد ماكان بيخسر
8 القدرة على انهاء اى تعدى بمنتهى البساطة مع الحفاظ على الكاريزما والشخصية الحاسمه
9سرعة البديهه
10 تغيير في الشخصية من شخصيه عنيفه وحاده لشخصيه متزنه
مع الاحساس بالامان والثبات جوه الموقف
💢ايه هى مستويات الانتقاد ؟
👈عندنا نقد بناء هدفه تصحيح الاخطاء وده بيكون من شخص متخصص او عنده خبره عاليه في الشئ اللى بينقده
👈وعندنا نقد هدام وده اللى محتاجين نتعلم ازاى نتعامل معاه ونرد عليه
النقد الهدام بيكون هدف الشخص الانتقاص من الاخر والتقليل منه لأسباب نفسيه منها الشعور بالنقص او الغيره
💢امتى الانتقاد يبقى فى العلن وامتى سرا بشكل ودى؟
مع كل أسف أصبح مجتمعنا بيشوف النقد جريمة في حين ان النقد غرضه التصحيح والمراجعة
كل الناس عرضه للخطأ لأننا لسنا معصومين
فمهم جدا يكون عندنا شجاعة تقبل النقد ومناقشة الأخطاء
فسواء كان الانتقاد في العلن او في السر الأهم هو انى عندى شجاعه تقبل النقد او مواجهة الانتقاد
ولو انا هوجه نقد في العلن فمهم جدا انى انتقد السلوك وليس الشخص بمعنى لو مدير هينتقد الموظف هيقوله شغلك الفترة دى فيه أخطاء كتير من فضلك ننتبه اكتر ونراجع الشغل كويس
هنا هو انتقد سلوك الموظف اللى هو اخطاءه في الشغل ف ده مقبول
لكن لو قاله انت كلك أخطاء ومبتعرفش تشتغل ودايما مبوظ الشغل كده هو موجه الانتقاد للشخص وده طبعا غير مقبول
أمتى الانتقاد يكون في السر بشكل ودى
لما اكون بينى وبين الشخص علاقة قوية وقريبه هنا بيكون في عاطفه بين الأشخاص فبيكون من الألطف هو توجيه النقد او الملاحظة (سرا)
وكان الرسول ص بيقول ما بال اقوام يفعلون كذا وكذا
كان بيوجه رسالته وملحوظاته بشكل ودى
وده جميل لحسن التواصل مع الأخرين
💢هل يؤثر الانتقاد على العلاقات بين الاشخاص؟
اه جدا
الانتقاد قادر ينهى علاقات وقادر يخلى النفوس تشيل من بعض
وقادر يحطم شخص ويدمره
انتقاد الزوج للزوجة مش بيبنى
احيانا بيظن الزوج انه كده بيساعدها تصلح القصور اللى عندها
لكن اللى بيحصل ان الزوجة بتبدأ تنفر من اسلوب الزوج في الكلام والتوجيه والانتقاد وده لأننا قولنا ان الانتقاد لما بيتوجه بشكل شخصي بيكون مؤلم للنفس لكن لو انتقد السلوك وارفقه بطلب محدد هى هتقبل وهتسمع منه
لكن من جهه تانيه الانتقاد كمان ممكن يبنى العلاقة
لما يكون المؤمن مرآه للمؤمن يعني انا هطور من نفسي ازاى وانا مش عارف عيوبي ، رحم الله امرء اهدى الي عيوبي
فلو صديقتى قالتلى انتقاد وانا خدت بالى انها بتتكلم فعلا صح انا هعدل من اخطاءى وهكون احسن
💢امتى نتغاضى اونصمت عن الرد على الانتقادات؟
ملهاش قاعده
الشخص نفسه لما يكون قوى وقادر على الرد بيقدر جدا يحدد الموقف ده يستدعى ارد ولا لا
لكن على سبيل المثال
👈 لما يكون الناقد من الدايرة المقربه
والدى مثلا او والدتى احتراما لسنه ومكانته بيكون عدم الرد مهم
👈 لو الناقد جاى يدخل شمال معايا انا ممكن اسمعه ومردش ودى بتبقي القاضيه بالنسباله لانه بيتغذى على انى انفعل او ارد عليه فلو انا سكت هو بيتجنن وانا بدى انطباع قوى وثقه عاليه جدا وبكسب احترام نفسي و الاخرين
لكن طبعا ليها شرط ان انا سكت وانا قوى وقادر على الرد لكن لو سكت لانى ضعيف ومش لاقي رد وقتها سكوتى بيبان للجميع انه ضعف وانا بشعر بقلة حيله
👈ممكن اتغاضي عن الرد كمان لو الشخص اللى بينتقد منفعل وغضبان والشخص ده حد مهم بالنسبالى فلما بتغاضي هو بيقدرلى ده لاحقا جدا وبيحترم سكوتى واحترامى لمشاعره
💢ماهى شروط فن اتقان الكلام ؟
👈الشرط الأول عدم التبرير
عشان أتقن فن الكلام ألغى من حساباتى التبرير تماما يعني لو زوح قال لزوجتة انتى ليه مهمله للولاد ومش بتذاكريلهم مينفعش ترد بمبررات انها مثلا منامتش كويس او ان شغل البيت بياخد وقتها، اول ما تبرر تعرف انها بتوقع كاريزمتها تماما
مثال كمان انت على طول متأخر فتبرر معلش اصل الطريق كان زحمه
التبرير ممنوع في كلامى
👈الشرط التانى اكون برد بثبات وهدوء
منفعلش من كلام اللى قدامى ولا اتهز
👈الشرط التالت اعود عقلى يرد ، فكرة انى اتكسف واتحرج وادارى ده بإنى أضحك كده عمرى ما هقدر اتعلم الرد
👈الشرط الرابع الرد بحكمه
مستخدمش اسلوب الهجوم او التوبيخ في الرد بالعكس انا باخد حقي كاملا من غير ما حد يغلطنى وده قمة الذكاء
ولو حد تعدى حدوده بتكلم بحزم معاه وبحط الحدود لان ده شئ مش مقبول ابدا السكوت عليه
لانى لو سبته اتعدى مره هيتعدى عليا بعدها ١٠٠ مره
👈الشرط الخامس مستخدمش حد شماعه
يعني لبسك مش متناسق
ده ذوق اختى
💢هل فنون الرد للشخص العادى مثل الرد للشخصية العامة او السياسى؟
كلهم بيكونو تحت معايير محدده
لكن هيزيد عليها مع الشخصية العامه او السياسي انه يلتزم بطبيعة مهنته اللى بتحتاج الظهور كلاميا بشكل احترافي جدا لأن الشخصيات دى بتكون تحت الأضواء فبيتحاسبو على الحرف مش بس الكلمة
💢ازاى ارد على الاسئلة المحرجة (بتقبض كم ما اتجوزتيش ليه لحد دلوقتى-اتطلقتى ليه -ا سقطت ليه مخلفتيش ليه لحد دلوقتى
ببساطة جدا جدا اعرف انى حر تماما في انى مجاوبش على الاسئله دى وبالتالى بدخل معاهم في مناقشة بسيطة من نوعية بتسأل ليه ، ليه عاوز تعرف
هنا الناقد بيتهز جدا لكن لو فضل بردو بيحاول يعرف منى بفضل انا كمان بستفسر منه
مثلا اقوله ده هيفيدك في ايه او بإنى بغير الموضوع
مثلا بتقبض كام ؟
انت هتغير شغلك ولا ايه
لا
امال بتسأل ليه على مرتبي
مثال تانى بين صديقتين
مخلفتيش ليه لحد دلوقتي
تفتكرى انتى ليه
معرفش ، هو ربنا لسه ما أرادش
انتى شاطرة عشان بتعرفي لوحدك
متجوزتيش ليه لحد دلوقتي
لا ياعمتو السؤال ده اتسألته كتير اسألينى سؤال جديد
وهكذا مش لازم رد مباشر خالص
⭐في النهاية احب اقول ان الرد مهارة زى اى مهارة ممكن نتعلمها وبتحتاج تدريب وتجربة لحد ما نتقنها وتكون جزأ من شخصيتنا
