” آه بحبك ”
الشاعر خالد فضل
شوفى ياحبيبتى …
كام سنه عدت
وأنا لسه بحبك
والعيال كبرت وشبت
وانا لسه بحبك
حتى والأحفاد بتحبى
لما كِبرت
وأنا لسه بحبك
مهما طال العُمر بينا
مهما مَس الشعر شيبه
مهما غيبنا ألف غيبه
حبنا بيكبر معانا
حب خالص .. كُله طيبه
مهما نبعد أو نقرب
مهما نمشى أو نجرب
عمرى مره .. عمرى مااهرب
دى الحقيقه
وإتلاقينى آجى جمبك
جمب قلبك ..غصب عنى
واتوه لو أبعد غصب عنى
لو دقيقه
الحقيقه
قلبى مش قادر يحبك مره تانيه
لأنه عمره ماينسى حبك حتى ثانيه
وحتى عمره ما دق دقه
إلا لما يقول بحبك
د أنا بعمرى بحبك
وهفضل العمر إللى باقى
وأنا لسه بحبك
آه بحبك
الشاعر/خالد فضل
