الزبادي بكل اسراره
سهير يوسف
مقاديره ..
( كوباية زبادى على كيلو اللبن )
كل ما كان الحليب بتاعنا كامل الدسم كل ما النتيجة كانت أفضل
الطريقة …
هنغلى الحليب على درجة حرارة متوسطة مش عالية عشان مايلسعش ويشيط فى الحلة من تحت وبعد ما يوصل للغليان هنحطوا على اهدى درجة نار عندنا ونسيبه من ربع لتلت ساعه يبخر كمية من المية اللى جواه عشان يتركز معانا ويتقل ودى خطوة مهمه جدا وبتفرق كتير فى النتيجة النهائية للزبادى … وعلاج لقصة إنه بيبقى فى ميه كتير جوة كوباية الزبادى ومش متجانس وكريمى زى الجاهز
بعد كده نرفعه من على النار ونسيبه يوصل لدرجة حرارة دافيه مايله للبرودة يعنى أقدر احط صباعى فيه
وهنجيب كوباية الزبادى وناخد كوباية من اللبن الحليب ونضيف معاهم ملعقة ص سكر ونقلبهم سوى بره الأول لغاية ما يدوبوا فى بعض كويس اوووى
ونضيفهم على كمية الحليب الكاملة وندوبهم فيه كويس أوى.
ملحوظة مهمة …
طعم الزبادى بيطلع نفس طعم نوع الزبادى اللى إحنا بنستعمله و بنضيفوا على الحليب … يعنى نختار طعم النوع اللي بنحبه ونعمل بيه
طريقة التسوية
عندك 3 اختيارات …
1️⃣ الاول لو عندك ماكينة الزبادى هنضيفهم فى الكوبيات ونغطيهم ونشغلها ل 4 أو 6 او 8 ساعات (حسب التعليمات المكتوبة على الماكينة)
2️⃣ الثاني لو مافيش ماكينة زبادى … هنسخن ميه ( دافية ) ونحطها فى صينية ونرص فيها كوبايات الزبادى بحيث المية تكون واصله لنص الكوباية تقريبا ويفضل نغطي الكوبيات ببلاستيك راب ، وهنسيبها برضوا حوالى 8 ساعات وممكن نزود أو نغير المية بعد ماتبرد بميه تانى دافيه بعد اربع ساعات
3️⃣ التالت اننا نغطى الكوبايات كويس سواء بغطاء أو ببلاستيك راب ونحطها فى مكان دافى للصبح
ممكن جوه الفرن (وهو مطفى طبعاً) أو نسخنه مسبقاً ونطفى عليه ولما يبقى من جوه دافى بنحط فيه الكوبيات ونسيبها من بالليل للصبح
أو من 8 ل 10 ساعات
عاوزين تضيفوا معاه فواكهه بنقطعها قطع صغيرة ونقلبها مع معلقة سكر ونسيبها ساعتين فى طبق أو مصفى تنزل جزء من ميتها وبعدين نقلبها مع الحليب ونصبها فى الكوبيات وبس كده خلص الزباااادى .
