نصائح نفسية لست البيت المنكوبة لفهم سي السيد ٭٭«مًقُآلَ سِآخِر» ٭٭
☆اللواء. أ.ح. سامي محمد شلتوت.
• نحاول أن تستوعب المرأة مكنون النفسية الذكورية لإخماد نيران الحرب المستعرة لفهم نفسية، معظم الذكور فى العالم وخاصة الشخصيه العربية. أقول لكى سيدتى الٱتى:
٭ الراجل لا يسأل« تحب تأكل إيه» .. و بإجماع العلماء الراجل مستعد يحفر نفق في جبل جرانيت بإستخدام الشوكة و السكينة .. و لا يسأل« تحب تتغدي إيه بكرة» .. الراجل يوضع أمامه الأكل و ياكل في سلام. فالرجل بطبعه فاقد الإحساس بالزمن .. و التخطيط الإستراتيجي طويل الأجل بالنسبة له التفكير في الوجبة القادمة.. و ساعات بيكسل يعمل كده كمان.
زي ما الست بتبقي «عايزة ورد يا إبراهيم» الراجل بيبقي عايز« أقعد مع نفسى شويه يا زينب».
أكاد أجزم إن كل الشرور و الآثام إللي في الدنيا سببها الأصلي راجل إتسأل و هوه لسه صاحي من النوم حناكل ايه أو إتطلب منه فلوس.
الرجالة و همه في فترة « سيبينى أقعد مع نفسى شويه يا زينب» بيبقوا أطرش.. بالمعني الحرفي للكلمة.. لو عايزة حاجة تروحي بالراحة جداً و تتسللي من ورا العبيد إللي واقفين يهووا بمراوح ريش نعام جنبه.. و تفتحي كانزاية البيبسي المشبرة ..و تصبيها بالراحة في كوبايته المفضلة من غير ما تتكلمي..و تخرفشي بكيس اللب السوبر في نعومة و تفضي نصه في طبق صيني عشان يعمل صوت..و تجيبي طبق كبير يرمي فيه القشر عشان ما يتعبش و هوه بيتف.. وبعدين بعدها بساعة تسأليه علي الحاجة إللي إنتي عايزاهاهيرد من أول مرة.الرجالة ما بتتكلمش بعد الأكل.
٭ المثل الإنجليزي بيقول «الرجل الجوعان هو رجل غضبان».. وده تحذير الرجل،يتحول إلى حيوان مفترس فاقد للتميز والعقل.الراجل بيحب الأكل أكتر من أي حاجة في الدنيا..أكتر من الستات والعربيات و الفلوس والمنصب..المنافس الوحيد للأكل هو النوم.والرغبة فى التخلص منك ومن همومك و مشاكل أولادك والعائلة بيدعي فى سجوده بأن ربنا ينجيه منكم.
٭ الشاي عقب الصحيان من نوم العصرية من مقدسات الرجل فحافظي على هذه العادة المقدسة.
٭ الراجل إللي بياخد باله من تغيير نوع البرفان أو تسريحة الشعر أو أى تغير فى اللبس أو فى البيت. ده راجل معدل وراثيا مش أصلي .. الراجل الأصلي لا بيشم ولابيحس ولايري فاقد الإدراك والرومانسية قمة الأنانية أصلاً.
٭ الستات بتعرف تفوق بنسبة (100%) بعد الصحيان بعشر دقايق.. الراجل في جميع مراحل نموه من ساعة ما يصحي من النوم و لحد ما يوصل الحضانة أو المدرسة أو الجامعة أو الشغل .. و لمدة ساعتين تلاتة بيبقي مرشوش عليه بيروسول .. بس بكمية لا تكفي لقتله .. بصوا علي أي راجل ماشي علي رجله أو راكب مواصلات أو سايق عربية الصبح .. ذبابة تتعافي جزئيا من رشة مبيد حشري.
٭ دورالبرد بيسحب الحياة و الطاقه من الرجالة زي الكريبتونايت بتاع سوبرمان بالظبط.ومرضه مرض موت حتى لوكان خربوش فى إيده.أديه الإحساس ده.علشان تخلصي.
٭ الغالبية العظمي من الرجالة خُرس..و إللي بيتكلم مش بيتكلم في البيت..أي محاولة لتغيير مجري الطبيعة حتؤدي إلي كوارث.
٭ في أي زمان و مكان و مهما كانت درجة تعقيد المشاكل مفيش حاجة ممكن تمنع الراجل إنه يبتسم قدام طبق بطاطس ملظلظة محمرة في الزيت أو طبق فروت سلاط لطيف.
٭ الراجل إللي بيسلك بلاعة مسدودة.. أو بيغير لمبة محروقة .. أو بيصلح حاجه في البيت .. ده إنسان بكل ما تحمله الكلمة من معني ولاينتمي لبني الرجالة الطبيعين.
٭ تغيير مكان المحفظة أو الدبلة أو النضارة أو الساعة أو الموبايل بالنسبة للراجل ده مشروع قومي .. بيتم بالتعاون مع اليونسكو .. فما بالك بتغيير مكان دولاب أو كرسي أو كنبة .. عايزة الراجل يقعد لك في البيت ما تشيليش حاجة من مطرحها و هو موجود.
٭ الكوليسترول و الدهون جزء أساسي من مكونات خلايا الراجل.. فبلاش الكلام الجارح بتاع الكرش و الريجيم عشان مش ناقصة سم بدن. وعكننة على نفسك…. لانها من، مقدسات الراجل.
٭ عايزة تعرفي الراجل بيحبك قد إيه خليه جاي من بره .. و مش شايف قدامه..و حطيله الأكل.. و مع أول لقمة في بوقه قولي له عملت إيه في موضوع كذا إللي كلمتك فيه من كام يو.. لو فضلتي عايشة يبقي بيموت فيكي و ده غالبا إللي بيحصل.. لو لا قدر الله السؤال طلع إنه القشة اللي قصمت ظهر البعير.. يبقي يا ريت الموضوع يقف على الطرد بس…
٭ بالنسبة للراجل المصري فيه فجوة زمنية غير محسوبة من ساعات الخليقة إسمها صباح الجمعة أو يوم الإجازة ده بيعتبره صباحيةالولادة بتاعته. زيك تانى يوم ماخلفتى البكري وأول فرحتكم.. إقتراحات الفطار بره و التمشية و الشوبينج و الكلام ده تعمليه مع صاحباتك.. الفترة من ليل الخميس حتي ظهر الجمعة إعتبري الراجل فيها في رحلة روحانية تصوفية لإكتشاف الذات زي الوقوف قدام التلاجة بالظبط.
٭ أهم نصيحة عاملى الرجال زي الطفل اللى لابس كافولة يعنى هو مش عارف عايز ايه ولا بيعرف يعبر ولا يعمل حاجة لنفسه معتمد عليكي تماما حتى فى نظفته الشخصية، أعتبرية طفل قبل مرحلة الفطام فاقد النطق والإحساس والتعبير والمسؤلية.
٭ فى الأخر رجالة الجيل ده بالذات مش حيعمروا كتير .. إلحقي أقعدي معاه و كفاية هري و طلبات عشان تطولي عمره الإفتراضي شوية.. هوه أصلا كده كده بره الضمان. ومش حيعيش معاكى كتير. أهم حاجة إعرفى باصورد بتاع كرت البنك علشان صرف المعاش. وباصورد الموبيل حًتٌيَ لا تفاجئ بالورثة المخفين.!!!!
