امبارح حصل موقف غريب جدا تقريبا اغرب موقف حصللى في حياتى .. من حوالى شهرين كده لقينا على سلم عمارتنا قطه بلدى مخلطه على سيامى , شكلها نضيف بس الزمن جار عليها .. القطه دى كانت لاجئه عندنا فى العمارة ورغم محاولات الجيران المستمره لتطفيشها الا انها كانت بترجع تانى وزى ماتقولوا كده ماكانتش بتستلطف حد غيرى لأنها كانت في الطالعه وفى النازله بتتمسح فيا وتهز ديلها وتنونو وانا الحقيقه قلبى ضعيف جدا فكانت بتصعب عليا وكنت كل ما بشوفها بفتكر اننا فعلا المفروض نرحم عزيز قوم ذل وهيه كان باين عليها انها بنت ناس ومن بيت عز لولا غدر الزمان وقسوة الحياه اللى خلتها تتحوجلنا .. انا بقى ومن باب الانسانيه المطلقه كنت كل يوم وانا نازل الصبح كالعاده مراتى بتدينى كيس الزباله عشان ارميه عادى يعنى وبما ان صديقتى الجديده كانت بتتمسح بيا وبالكيس فكنت أوقات كتير بضعف قصاد الحاحها ونونوتها واسيبهولها تقزقز فيه براحتها بس للاسف الموضوع ده عمل مشاكل لا حصر لها زى ان كل سكان العماره بقوا بيشكوا في بعضهم وماحدش عارف مين الانسان المعفن اللى بيرمى الزباله عالسلم كل يوم ! ومراتى يوميا تشتم في الشخص ده وتحسبن عليه وتقولى انا لو عرفته هضربه بالجزمه الواطى ده ! كل ده وانا لابس الوش ومستعبط تماما لكن طبعا اضطريت انى ابطل الحركه دى واجمد قلبى شويه وماضعفش قصاد القطه تانى في سبيل استقرار العماره ونضافتها امبارح بقى بليل وبعد ما البيت كله نام كنت واقف في المطبخ بسخن لبن فسمعت صوت القطه على باب الشقه بتنونو بهستيريا وبجنون ,شكلها كانت جعانه جدا وتقريبا شمت ريحة اللبن فكانت هتتهبل .. طبعا بسرعه وبدون تردد مليت كوبايه بلاستيك وفتحت الباب حطيتهالها وقعدت شويه اتفرج عليها وهيه بتشرب بمنتهى السعاده ودخلت بعدها انام وانا مبسوط ومرتاح الضمير جدا .. مافيش ياعم هما عشر دقايق وانا خلاص عنيا بتغفل وهروح في النوم سمعت صوت خربشه على باب اوضة النوم .. بسرعه قعدت وحاولت اركز اكتر واسمع ايه ده لقيت القطه بتنونو بصوت ضعيف ومخنوق جدا ! ..يابنت المجنونه ازاى دخلتى جوه الشقه ! طبعا قومت بسرعه وانا ناويلها على نيه سوده ومهببه ولسه بفتح الباب عشان اطردها من العماره خالص شميت ريحه غاز جامده جدا لدرجة انى ماكنتش عارف اخد نفسى فجريت عالمطبخ بسرعه لقيتنى ناسي اللبن عالنار وطبعا فار والغاز كان بيسرب بكميه رهيبه وخلاص كان هيخنقنا كلنا ..بسرعه قفلته وفتحت شبابيك البيت كله واطمنت عالاولاد وحمدت ربنا وصليت ركعتين شكر لله .. مش عارف لحد دلوقتى ايه اللى حصل لانى متاكد بصراحه انى قفلت باب الشقه مع انى لقيته موارب ! جايز يكون رد تانى وماتقفلش كويس او جايز يكون حاجه تانيه اكبر من استيعابى العقلى لكن المؤكد ان ربنا أراد كده وخلى القطه اللى انا ساعدتها انها تشبع تكون هيه نفسها سبب في انقاذ حياتى وحياة عيلتى .. الحقيقه من امبارح وانا مش عارف اتلم على اعصابى ومش شايف قدامى الا معنى واحد في الحياه وهوه انك لازم تعمل الخير وماتنتظرش مقابل لكده لان ربنا كبير اوى اوى وهيردهولك اضعاف مضاعفه في الوقت اللى تكون في اشد الحاجه له .. صدقنى هيتردلك هيتردلك ولو كان على يد قطه
