غير مصنف
عارف إمتى بيبقى كلامك واضح جدا جوة عنيك
بقلم محمد السمان
عارف إمتى بيبقى كلامك
واضح جدا جوة عني
لما يكون واقف قدامك
إنسان فعلاً حاسس بيك
عنده مشاعر زى مشاعرك
من نظراتك تلاقيه سامعك
يقرا عنيك من غير ألغاز
وانت ف عز سكون الصمت
يسمع صوتك بالإحساس
هى حقيقة بتحصل لكن
مش موجودة ف كل الناس
علشان كده دايما ترتاح
لما تقابل شخص مُعين
تلقى الهم ف لحظة انزاح
والجرح بقى ف قلبك هين
شخص تحس بإنه علاج
لما يكون جنبك ومعاك
بيحس بوجعك جواك
من قبل ما تحكى ولا تبين
فيه حاجات مش بسهولة تبان
ولا تتقال بالشرح وبس
ياما حاجات جوة الانسان
مابتتقالش لكن تتحس
