قصيدة شحات

قصيدة

شحات

.……………..أيمن البكري

شحات يا باشا شحات يابيه
والشحاتين أنواع كتير
شحات بيشحت علشان مش قادر
وممعهوش حق قوته
وواحد واخدها مهنه
بيخلي دايماً
نبرة ضعف في صوته
وشحات بيشحت بس بشياكه
يقولك المحفظه ضاعت
ممكن حق المواصلات
وإدينى رقم التليفون بتاعك
علشان إل ها أخده هردهولك

والشحاته مش بس فى الفلوس
لما ظهر فينا ضعف النفوس
إتملينا ب النداله والسذاجه
بقينا بنشحت كل حاجه
بنشحت الكلام والسلام والإهتمام
بنشحت حتى الإحترام
بتشحت إحتياجاتك من المدام
بتشحت الأمل علشان تعدى الأيام
بتدارى الوجع وتضحك ضحكه كدابه
وإنت جواك كتير أحزان
لو حد سألك عامل إيه بتضحك عليه
وبتقوله كله تمام

حتى حقك بتشحته من مديرك
تكلمه مليون مره على الزياده
يقولك حاضر وطيب ومن عنيا
ويمشى كأنه مسمعش أى حاجه
بتشحت من زمايلك الصداقه
بتشحت الأمانة من ناس بتمثل
الطيبه والإخلاص والبرأه
كتير بتحس إنك ضعيف
وكأنك عايش ف غابه
ولما تخاف من ربنا
بتشحت دعوه حلوه من الغلابه
بقيت زى ماتكون عقيم
نفسك ف طفل يقولك يابابا

حتى الحب بقا ب الشحاته
كل حكاية حب كانت فيها إتنين
دلوقتى بقوا تلاته
بتشحت الحنان من عيون حبيبتك
نفسك من زمان تكون خطيبتك
بتقولها كتير بكلمك وإنت, مش معايا
هى بتحبك وقلبها معاك وياما قالت
بس عنيها على التالت
التالت إل فى الحكايه
والتالت إل معاه الفلوس
خلاها على قلبها تدوس
داست عليك بكل قوه
وإختارته هو
وكام قصه قبل منك
خلصت بنفس النهايه