لمسه جميله من قبل الحكم لوقف المباراة علشان نجمنا محمد صلاح وزميله بالفريق إبراهيما كوناتي واللاعبين المسلمين يفطروا..
كتب يحي محمد الداخلى
في مباراة ليفربول وشيفلد يونايتد الحكم الإنجليزي ستيوارت أتويل أوقف المباراة علشان نجمنا محمد صلاح وزميله بالفريق إبراهيما كوناتي واللاعبين المسلمين يفطروا..
والحقيقة مش تحيز للدوري الإنجليزي الأفضل في العالم، واللي مش محتاج تحيز أصلًا، بس هم أكتر ناس بتقدر تحترم اللاعبين وتعطيهم حقوقهم..
يعني مباراة زي دي الحكم يوقف اللعب ويفطر اللاعبين في حين إننا بنشوف دوريات كبيرة في العالم زي الدوري الفرنسي مش بيسمح حتى بصيام اللاعبين وبيتم استبعادهم من المباريات، وحتى الأندية نفسها بتاخد موقف متشدد ضد اللاعبين..
وفيه دوريات بتسيب الأمر للحكم نفسه يعني لو حب يوقف المباراة بيعمل دا أو يكمل الماتش وكتير الحقيقة بيوقفوا الماتشات…
موقف رائع من الدوري الإنجليزي وانحياز جميل نحو حرية الإيمان والعقائد وأن اللاعيبة دي من حقها تصوم ومن حقها تفطر وتوفر لها الحماية كمان، علشان كدا الدوري الإنجليزي بقوانينه والتزامه الأفضل في العالم بفارق كبير عن أي دوري.
كل التوفيق لنجمنا وأسطورتنا محمد صلاح وفريقه في صراعهم على لقب الدوري الإنجليزي، هم متصدرين بفارق نقطتين، وأتمنى يكون اللقب دا من نصيبهم لأنهم يستحقوا وأسطورتنا صلاح يستحق…
